Azərbaycan ədəbiyyatının görkəmli nümayəndəsi, istedadlı nasir, tanınmış ədəbiyyatşünas, pedaqoq və ictimai xadim, Xalq yazıçısı İsmayıl Şıxlının anadan olmasının 105 ili martın 22-də tamam oldu. Cəfər Cabbarlı adına Respublika Gənclər Kitabxanasında Xalq yazıçısının 105  illik yubileyi münasibətilə virtual kitab sərgisi hazırlanıb.

“Ədəbiyyat və incəsənət” portalı kitabxanaya istinadən xəbər verir ki, virtual kitab sərgisində İsmayıl Şıxlının həyat və yaradıcılığı, ictimai fəaliyyəti haqqında geniş məlumat verilir, Ulu Öndər Heydər Əliyevin,  Prezident İlham Əliyevin, akademik Nizami Cəfərovun və digər görkəmli şəxslərin onun haqqında söylədikləri dəyərli fikirlər təqdim edilir. Materialda müəllifin “Dəli Kür”, “Ayrılan yollar”, “Ölən dünyam”, “Namərd gülləsi”, “Cəbhə yolları”, “Namus qaçağı” kimi əsərlərinin qısa annotasiyası, İsmayıl Şıxlının layiq görüldüyü mükafatlar, yazıçının foto qalereyası da sərgilənir.

Xalq yazıçısı İsmayıl Şıxlının 105 illik yubileyi münasibətilə hazırlanan virtual kitab sərgisi kitabxananın rəsmi saytında https://ryl.az/multimedia/ismayil-sixli-105 yerləşdirilib.

“Ədəbiyyat və incəsənət”

(27.03.2024)