“Ədəbiyyat və incəsənət” portalı Coşqun Xəliloğlunun “Şəhidlər barədə şeirlər” silsiləsini təqdim edir. Bu gün Kamran Kazımova həsr edilmiş şeirlə tanış olacaqsınız.

KAMRAN QURBANƏLİ OĞLU KAZIMOV

(07.12.1990.-05.10.2020.)

Əslən Ucar rayonunun Bərgüşad kəndindən olan Azərbaycan Daxili İşlər Nazirliyinin Daxili Qoşunlarının baş leytenantı,  Qarabağın azad edilməsi uğrunda Vətən müharibəsini şəhidi.

               “KOBRA” LƏQƏBLİ KAMRAN

Necə  qorxmaz idi, cəsarətliydi,

Məğrurdu, cəsurdu, mətanətliydi,

Dostluqda saf idi, sədaqətliydi,

Düşməni məhv etdi, vermədi aman,

Baş leytenant, “Kobra” ləqəbli Kamran.

Bu peşəni uşaqlıqdan seçmişdi,

Pillələri addım-addım keçmişdi.

İntiqamı almağa and içmişdi,

Torpaq intiqamı olur çox yaman,

Baş leytenant, “Kobra” ləqəbli Kamran.

Atası da onun zabit olmuşdu,

Qeyrətli, namuslu  igid olmuşdu.

Atadan nəsihət, öyüd almışdı,

-Çalış oğlum, çalış, dayanmır zaman,

Baş leytenant, “Kobra” ləqəbli Kamran.

Kamrangil məhv etdi nankor düşməni,

Azad eylədilər ana Vətəni,

Qovdular biryolluq “Yoldanötəni”

Dağıldı buludlar, çəkildi duman-

Baş leytenant, “Kobra” ləqəbli Kamran.

Necə vətənpərvər, necə də ərdi,

Şəhidlik  qismətmiş, onu da gördü,

Cənnətdən solmayan çiçəklər dərdi,

Oldu çox yaraya, mərəzə dərman-

        Baş leytenant, “Kobra” ləqəbli Kamran.

Kamranlar anlatdı  nədir ləyaqət?

Vətən üçün ölüm – şərəf, səadət.

Qalıb üç övladı bizə əmanət,

Ərtoğrul, Kamrana, bir də ki, Aydan,

Baş leytenant, “Kobra” ləqəbli Kamran.

“Ədəbiyyat və incəsənət”

(14.02.2024)