“Ədəbiyyat və incəsənət” portalı Coşqun Xəliloğlunun “Şəhidlər barədə şeirlər” silsiləsini təqdim edir. Bu gün Əbubəkir İsmayılova  həsr edilmiş şeirlə tanış olacaqsınız.

ƏBUBƏKİR VÜQAR OĞLU İSMAYILOV

(10.02.1990.-02.04.2016.)

 Kürdəmirdə anadan olmuş,  Azərbaycan Respublikasının Hərbi Hava Qüvvələrinin baş leytenantı, pilot,  Qarabağ uğrunda Aprel döyüşlərinin şəhidi

                ŞƏHİDLƏR OLMASAYDI…

Bu Vətənin nə qədər cəsur insanları var,

Qorxmaz, mərd, şir ürəkli igid aslanları var,

İsmətli qız-gəlini, qoçaq oğlanları var,

Onlarlardan biz nə qədər söz-söhbət açsaq azdı,

Şəhidlər olmasaydı  torpaq Vətən olmazdı!

Aprel şəhidlərindən biridir  Əbubəkir,

Bu yurdun övladıdır – ana yurdu Kürdəmir,

Elə ömür yaşadı, hamıya örnək ömür,

İgid şahin səmada ölməz bir əsər yazdı,

Şəhidlər olmasaydı  torpaq Vətən olmazdı!

Ali Hərbi Məktəbdə oxumaq məqsədiydi,

Təyyarəçi olmaqsa, arzusu, mətləbiydi,

Yolu özü seçmişdi, ürəyinin səsiydi,

Bu səs, bəlkə, tanrıdan gələn nida-avazdı,

Şəhidlər olmasaydı  torpaq Vətən olmazdı!

Təhsili    başa vurub, oldu yetkin bir zabit,

Həm geniş qəlbli idi, həm də qorxmaz bir igid,

Başqa cür olammazdı, almışdı halal öyüd,

Çətinlikdən qorxmazdı, heç nədən sarsılmazdı,

Şəhidlər olmasaydı  torpaq Vətən olmazdı!

Qorxu nədir, bilməzdi, onu çoxdan qovmuşdu,

Aprel döyüşlərində qəhrəmantək vuruşdu,

Təbrizlə, Urfan ilə ölməzliyə qovuşdu,

Üç qardaş-üç dost idi, bu dostlar ayrılmazdı,

Şəhidlər olmasaydı  torpaq Vətən olmazdı!

Şəhid olan zamanı küləklər saçın yoldu,

General olmasa da ucadan uca oldu,

Yaşamaqçın əbədi, neçə ürəyə doldu,

Elin Əbübəkirə məhəbbəti ölməzdi,

Şəhidlər olmasaydı  torpaq Vətən olmazdı!

 “Ədəbiyyat və incəsənət”

(22.01.2024)