“Ədəbiyyat və incəsənət” portalı sizlərə gənc yazar Elşad Baratın “Şəhidlər” silsiləsindən yazdığı şeirlərini təqdim etməkdədir.

Kənan Faiq oğlu İsrafilov

Kənan İsrafilov 8 noyabr 1990-cı ildə Şəki rayonunun Şirinbulaq kəndində dünyaya göz açıb. Cəmşid Naxçıvanski adına hərbi liseydən məzun olan Kənan 2008-2012-ci illərdə Heydər Əliyev adına Azərbaycan Ali Hərbi Məktəbində təhsilini davam etdirib.

2013-2018-ci illərdə Murovdağda komandir olub. 2018-ci ildən qərargah rəisi kimi fəaliyyətini davam etdirib. 2018-ci ildə Müdafiə Nazirliyinin Hərbi Akademiyasında təhsil alan Kənan 2020-ci ilin iyun ayından Goranboy rayonunun Aşağı Ağcakənd qəsəbəsində tabor komandiri kimi fəaliyyətini davam etdirmişdir.

27 sentyabr 2020-ci ildə başlayan Qarabağ müharibəsində kapitan Kənan İsrafilov tabor komandiri kimi döyüşlərdə iştirak edib. Füzulinin, Cəbrayılın və Suqovuşanın azad edilməsi uğrunda gedən döyüşlərdə döyüş tapşırığını yerinə yetirərkən kapitan Kənan İsrafilov 5 oktyabr 2020-ci ildə şəhid olub.

Azərbaycanın ərazi bütövlüyünün təmin edilməsi uğrunda döyüş əməliyyatlarını şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən kapitan Kənan İsrafilov ölümündən sonra "Vətən uğrunda" medalı ilə təltif edilib.

Salam, qəhrəman adam,

Salam, Murov qartalı.

Düşmənləri qorxuya

Salan Murov qartalı.

Denən, nə yazım sənə?

Zəfər tariximizdə

Səndən böyük iz qalıb,

İgidliyin önündə

Qələm də aciz qalıb.

Sən nənənin, babanın

Yanında böyümüşdün.

Bu vətənin, torpağın

Canında böyümüşdün.

İndi də böyüyürsən,

Vətən boyda bədənsən.

Bakıdan Zəngəzura,

Təbrizəcən vətənsən.

“Ədəbiyyat və incəsənət”

(11.12.2023)