Moskvada “IRS-Naslediye” jurnalının növbəti sayı işıq üzü görüb. 

Nəşrin bu sayı Azərbaycan xalqının Ümummilli Lideri Heydər Əliyevin 100 illiyinə həsr olunub. 

Baş redaktor Musa Mərcanlı öz yazısında 2023-cü ilin Azərbaycanda “Heydər Əliyev İli” elan edildiyini oxuculara xatırladır. 

Nəşrin bu sayında tarixçi alim Eldar Abbasovun sovet dövrünün sonunda erməni millətçilərinin Heydər Əliyevə hücumları ilə bağlı materialının son hissəsi dərc edilib. Məqalədə qeyd olunur ki, Heydər Əliyevin 1987-ci ildə SSRİ-də faktiki olaraq bu ali hakimiyyət orqanı daxilindəki qruplar arasında siyasi mübarizə nəticəsində Sov. İKP MK-nın Siyasi Bürosundan istefasından qısa müddət sonra erməni millətçiləri Dağlıq Qarabağda Ermənistan-Azərbaycan münaqişəsinin başlanğıcı olan separatçı hərəkata başladılar.

“IRS-Naslediye” jurnalının bu sayında tarix elmləri doktoru Emin Şıxəliyevin İranda ruhani rejimi, bu rejimin Ermənistanla əməkdaşlığı genişləndirmək siyasəti haqqında məqalə təqdim olunub. 

Nəşrin digər materialları arasında sovet kosmonavtikasının çoxillik rəhbəri, “tamamilə məxfi” general Kərim Kərimova həsr olunmuş məqalə oxucunun diqqətini çəkir.

Tarix elmləri doktoru Georgi Mamuliyanın Azərbaycan diplomatiyası tarixinin mühüm səhifələrinə həsr olunmuş məqaləsinin birinci hissəsi tarixsevərlərin diqqətini cəlb edəcək. Filologiya elmləri doktoru Əbuzər Bağırov yazıçı Əbülhəsən Ələkbərzadədən bəhs edir. 

Həmişə olduğu kimi, nömrədə jurnalın ənənəvi rubrikalarının materialları təqdim olunur. “Foto-irs” rubrikasında Heydər Əliyev şəxsiyyətinin Azərbaycan foto sənətində əks olunması haqqında material yerləşdirilib. Ümumilikdə, nəşrin bu sayı oxuculara Azərbaycan haqqında bilikləri genişləndirmək üçün yeni imkanlar təqdim edir.

“Ədəbiyyat və incəsənət”

(11.05.2023)