ÖTƏN İL BU GÜNLƏRDƏ Türk Dünyasında TÜRKSOY-un 30 illik yubileyi təntənə ilə qeyd olundu

Rate this item
(0 votes)

Könül, “Əədbiyyat və incəsənət”

Ötən ilin bugünkü günlərində baş verən hadisələr içindən bu dəfə sizlər üçün  Beynəlxalq Türk Mədəniyyəti Təşkilatının  - TÜRKSOY-un yaradılmasının 30 illiyinin üzv ölkələrdə qeyd olunması törənlərini seçdim.

 

Türk Dünyasının ilk beynəlxalq təşkilatı, türk xalqlarının mədəniyyət və incəsənətinin ortaq çətiri olan TÜRKSOY-un yaranmasının 30-cu ildönümü təşkilata üzv ölkələrin ev sahibliyi ilə müxtəlif tədbirlərlə qeyd edilməklə bir bayram ovqatı yaratmışdı.

TÜRKSOY-un yaradıcı ölkələrindən olan Azərbaycan, Qazaxıstan, Qırğızıstan, Özbəkistan, Türkmənistan və Türkiyənin sənətçilərinin iştirak etdikləri tədbirlər iyunun 9-da Qazaxıstanın paytaxtı Almatıda, iyunun 13-də Qırğızıstanın paytaxtı Bişkekdə, iyunun 18-də Özbəkistanın paytaxtı Daşkənddə, iyunun 26-da Türkmənistanın paytaxtı Aşqabadda keçirildi.

Sual edəcəksiniz ki, bəs Bakı və Ankara niyə tədbirlərə evsahibliyi eləmədi. Cavab sadədir. Rəsmi şəxslər, nümayəndə heyətləri, musiqi qrupları coğrafi ərazicə qonşu olan 4 Orta Asiya ölkələrində iyirmi gün davam edən tədbirlərdə ardıcıl qatıldılar, Azərbaycan və Türkiyə başqa coğrafiyada olduğu üçün onların tədbirlərə evsahibliyi etmələri məqsədəuyğun sayılmadı. Bu da təbiidir. Onsuz da TÜRKSOY-un əksər tədbiri Türkiyədə və Azərbaycanda keçirilir.

TÜRKSOY-un 30 illik yubileyi çərçivəsində təşkil edilən TÜRKSOY Mədəniyyət Günləri xəbər verdiyimiz kimi iyunun son günündə Aşqabadda keçirilən konsertlə başa çatdı.

Mahtumqulu Firaki adına Dram Teatrında baş tutan konsertdə Türkmənistan Dövlət Simfonik Orkestri, Türkmənistan Dövlət Xorunun və Türk dünyasının müxtəlif ölkələrindən opera sənətçiləri iştirak edirdilər.

Tədbirin əvvəlində TÜRKSOY-un baş katibi Sultan Raev TÜRKSOY-un işinə və Türk Dünyasında əməkdaşlığa töhfə verən insanlara TÜRKSOY-un 30 illik yubiley medallarını təqdim etdi.

Möhtəşəm bir atmosfer var idi.

Türk xalqlarının bu birliyi gələcəyin türk dövrü olmasına əsl zəmin hazırlamaqdadır.

 

“Ədəbiyyat və incəsənət”

(05.07.2024)