Öncə açılan sərgi barədə: Şirvanşahlar Sarayı Kompleksində açılan beynəlxalq müasir incəsənət sərgisi Höte İnstitutunun “İçərişəhər” Dövlət Tarix Memarlıq Qoruğu İdarəsi ilə birgə “Kappelhaus” Azərbaycan-Alman Mədəniyyət Birliyinin və PlatformART-ın təşkilatı dəstəyi ilə ərsəyə gətirilib.
Sərgi Qurban Səid təxəllüsü ilə tanınan Əsəd bəyin həyat və yaradıcılığına həsr edilib.
Sərgidə əsasən Əsəd bəyin yaradıcılığında xüsusi yer tutan həqiqət və uydurmaların bir-birinə qarışdığı “Şərqdə neft və qan” adlı tarixi-publisistik romanından ilhamlanaraq yaradılan rəsm əsərləri nümayiş olunur. “Əli və Nino” Azərbaycan — Gürcüstan məhəbbət tarixçəsinin müəllifi olan Əsəd bəy, sonralar “Qurban Səid” təxəllüsü ilə də tanınıb.
Əsəd bəy Bakıda beynəlmiləl bir mühitdə - ruslar, almanlar və azərbaycanlıların arasında böyüyüb və XX əsrin əvvəllərində şəhərdə yaşanan ilk “neft bumunun” şahidi olub: o zamanlar, dünyada xam neftin demək olar ki, yarısı məhz Bakıda hasil olunurdu. Şərqin möhtəşəmliyi kəskin sosial fərqlər, fəhlə üsyanları və inqilabi təlatümlərlə əhəmiyyətli ziddiyyət təşkil edir. Oktyabr inqilabından sonra, Bakıdan gedən yazar, müxtəlif ölkələrin sərhədlərini keçən kosmopolitə çevrilib: Mərkəzi Asiya, İran, Gürcüstan və Türkiyə onun Berlin şəhərinə gedən yolda müvəqqəti “dayanacaqlar” olub. Berlində o, İslam dinini qəbul edir, ən azı 18 kitab yazır və qısa zamanda Şərq üzrə mütəxəssis kimi tanınır.
Sərgidə əsasən Əsəd bəyin yaradıcılığında xüsusi yer tutan həqiqət və uydurmaların bir-birinə qarışdığı “Şərqdə neft və qan” adlı tarixi-publisistik romanından ilhamlanaraq yaradılan rəsm əsərləri nümayiş olunur.
Qeyd edək ki, Şirvanşahlar Sarayı Kompleksində təşkil edilən bu sərgi oktyabrın 16-dək davam edəcək.
İndi isə açılacaq sərgi barədə. Oktyabrın 17-də Azərbaycan Milli İncəsənət Muzeyində “Belçikaya komikslərlə səyahət” adlı sərginin açılışı olacaq.
Sərgi layihəsinin açılışı Belçika Krallığının Azərbaycandakı səfirliyi, Mədəniyyət Nazirliyi və Belçika Komiks Mərkəzinin təşkilatçılığı ilə keçiriləcək.
Şəkildə: “Əli və Nino”ya fotokollaj