Taylandın paytaxtı Banqkokun ən iri və mötəbər konsert salonlarından biri olan Banqkok Beynəlxalq Mədəniyyət Mərkəzinin Böyük zalında Tayland Kral Simfonik Orkestrinin konserti təşkil edilib. 

AzərTAC xəbər verir ki, həmin konsertdə orkestri Taylandın tarixində ilk dəfə olaraq azərbaycanlı dirijor, Akademik Opera və Balet Teatrının musiqi rəhbəri və baş dirijoru, Əməkdar artist Əyyub Quliyev idarə edib. 

Azərbaycanlı dirijorun Taylanda səfəri musiqi kollektivin rəhbərliyi və eyni zamanda orkestrin himayədarı və yaradıcısı olan Taylandın şahzadəsi Əlahəzrət Sirivannavari Rayakanyanın dəvəti nəticəsində gerçəkləşib. 

Mürəkkəb musiqi proqramı ilə seçilən konsertin əsas ideyalarından biri dahi bəstəkar Sergey Raxmaninovun 150 illiyi ilə bağlı idi. Həmin gecə Sergey Raxmaninovun fortepiano və orkestr üçün “Paqanini mövzusunda Rapsodiyası” Çinin tanınmış pianoçusu Ze-Ze tərəfindən böyük məharətlə təqdim olunub. 

Proqramın orkestr bölümündə səslənən dahi bəstəkarlar P.Çaykovskinin “İtalyan kapriççiosu” və İ.Stravinskinin “Atəş quşu” baletindən süitası konsertə xüsusi rəng qatıb. 

Dinləyicilərin alqışlarını və istəyini nəzərə alan dirijor Əyyub Quliyev salonda əyləşən qonaqlara müraciət edərək, Azərbaycan musiqi ifaçılığını Taylandda ilk dəfə təqdim etməkdən qürur duyduğunu söyləyib və Kral Orkestrinə öz minnətdarlığını bildirib. 

Proqrama gözlənilmədən əlavə olunmuş yeni əsərləri ifa edən Kral Banqkok Orkestri dinləyicilərin xüsusi alqışları ilə qarşılanıb. Konsert bitdikdən sonra salonun foyesində gecəyə toplaşmış qonaqlarla azərbaycanlı dirijor Əyyub Quliyev və çinli pianoçu Ze-Zenin görüşü keçirilib.

“Ədəbiyyat və incəsənət”

(06.06.2023)