Milli Məclisin Mədəniyyət Komitəsinin sədri Fazil Mustafa Azərbaycan Respublikasının Əməkdar rəssamı, Milli Xalça Muzeyinin baş rəssamı Taryer Bəşirova təbrik məktubu ünvanlayıb.
Xalça rəssamı, çətən ustası olaraq ün qazanmış sənətkarın 65 illik yubileyi ilə bağlı təbrik məktubunda onun yaradıcılığının ən ümdə məqamlarına vurğu edilib.
“Ədəbiyyat və incəsənət” portalı məktubun mətnini təqdim edir:
“Hörmətli Taryer müəllim,
Sizi 65 illik yubileyinizlə bağlı təbrik edir, möhkəm cansağlığı, yeni yaradıcılıq uğurları diləyirəm!
Sizin bir xalçaçı-rəssam olaraq yetişməyinizdə, əldə etdiyiniz uğurlarda 1983-1988-ci illərdə Rəssamlıq fakültəsində təhsil aldığınız Azərbaycan Dövlət İncəsənət İnstitutununda (indiki ADMİU-da) öyrəndiklərinizlə yanaşı, özünüzün işgüzarlığınız, sənətə ürəkdən bağlılığınız da önəmli faktorlardır.
1983-cü ildən başlayaraq davamlı olaraq respublikamızda və xarici ölkələrdə təşkil olunan nüfuzlu sərgilərdə (xalça və çətən örnəkləri ilə) uğurla iştirak edirsiniz.
Ornamental və portret xalçalar sizin yaradıcılığınızın əsas yönünü təşkil edir. Çağdaş çətən texnikası ilə toxunan xalçalara bir çox yenilikləri siz qazandırmısınız.
Siz, dünyaşöhrətli sənətkar – Xalq rəssamı Tahir Salahovun müəllifi olduğu rəngkarlıq əsəri əsasında toxunan “Üzeyir bəy Hacıbəyli” xalçasının texniki layihəsinin rəhbəri, eləcə də, bir sıra digər maraqlı əsərlərin müəllifisiniz. – “Kitabi Dədə Qorqud” dastanına həsr olunmuş “Beşiyim – əbədiyyətim” adlı süjetli çətən, Lətif Kərimovun 80 illik yubileyinə həsr olunmuş portret çətən, Nizami Gəncəvinin 850 illiyinə həsr olunmuş süjetli portret çətən, Azərbaycan Dövlət Musiqili Komediya Teatrında nümayiş olunan səhnə pərdəsi kimi toxunan 150 m² sahəsi olan “Azərbaycan ulduzları” adlı xalça, M.Rastropoviçə həsr olunmuş süjetli portret xalça və b. - sizin yaratdığınız çoxsaylı xalça və çətən örnəklərinə aiddir.
Bir sözlə, ölkəmizin tanınmış xalça rəssamı, çətən ustası, Azərbaycan Rəssamlar İttifaqının üzvü, Milli Xalça Muzeyinin baş rəssamı olaraq siz öz uzunmüddətli, səmərəli xidmətlərinizlə seçilirsiniz.
Sizi yaradıcılıq uğurlarınız və yubileyinizlə bağlı Mədəniyyət Komitəsi adından bir daha təbrik edir, ən xoş diləklərimizi yetirirəm”!
“Ədəbiyyat və incəsənət”
(06.05.2024)