Murad Vəlixanov,
"Ədəbiyyat və incəsənət" portalının İncəsənət şöbəsi
Kapitan Rövşən Mahmud oğlu Pənahov, Azərbaycanın müasir hərb tarixinə adı qızıl hərflərlə yazılmış, iki böyük döyüş sınağından keçərək şəhadət zirvəsinə ucalmış rəşadətli zabitlərimizdəndir. Onun ömür yolu hər bir azərbaycanlı üçün vətənpərvərlik, şərəf və fədakarlıq nümunəsidir. Rövşən Pənahovun həyat hekayəsini xüsusi edən həm də odur ki, onun dünyaya göz açdığı gün ilə əbədiyyətə qovuşduğu gün eyni tarixə – 2 oktyabr tarixinə təsadüf edir.
Erkən illəri və hərbi təhsili
Rövşən Pənahov 2 oktyabr 1989-cu ildə Qazax rayonunun Birinci Şıxlı kəndində anadan olmuşdur. Hərbi peşəyə sevgisi hələ uşaq yaşlarından formalaşan Rövşən, orta məktəbi bitirdikdən sonra ömrünü tamamilə orduya həsr etmək qərarına gəlir.
2006-cı ildə Heydər Əliyev adına Azərbaycan Ali Hərbi Məktəbinə (AAHM) daxil olur.
2010-cu ildə həmin ali məktəbi uğurla bitirərək leytenant rütbəsi ilə zabit kimi xidmətə başlayır.
2010–2020-ci illər ərzində Azərbaycan Silahlı Qüvvələrinin müxtəlif regional "N" saylı hərbi hissələrində, xüsusilə ön xətt bölgələrində nümunəvi xidmət göstərir, motoatıcı bölüyün komandiri vəzifəsinə qədər yüksəlir.
Aprel döyüşlərindən vətən müharibəsinə
Rövşən Pənahov peşəkar zabit kimi ilk böyük döyüş təcrübəsini 2016-cı ilin Aprel döyüşlərində qazanır. 1–5 aprel tarixlərində cəbhə xəttində Ermənistan silahlı qüvvələrinin təxribatlarının qarşısının alınmasında və strateji mövqelərin azad edilməsində göstərdiyi xüsusi şücaətə görə vaxtından əvvəl "kapitan" hərbi rütbəsi ilə təltif olunur.
27 sentyabr 2020-ci ildə başlayan İkinci Qarabağ müharibəsində bölük komandiri kimi ilk günlərdən ön cəbhəyə atılır. Onun rəhbərlik etdiyi bölük çətin relyefə malik olan Murovdağ silsiləsinin və Kəlbəcər istiqamətindəki strateji yüksəkliklərin azad edilməsi uğrunda gedən şiddətli döyüşlərdə iştirak edir.
Son döyüşü və şəhadəti
Kapitan Pənahov Göygöl rayonunun Toğanalı kəndi istiqamətində və Kəlbəcərin "Tufandağ" döyüş mövqeyində, eləcə də Ömər aşırımı yaxınlığında düşmən hücumlarının qarşısının alınmasında mərdliklə vuruşur.
2020-ci il oktyabrın 2-də cəbhənin çətin və mürəkkəb nöqtələrindən birində düşmənin atdığı minaatan mərmisinin partlaması nəticəsində aldığı ölümcül qəlpə yarasından qəhrəmancasına şəhid olur. Şəhid olduğu gün qəhrəman zabitin 31 yaşı tamam olurdu. O, doğum günündə doğulub boya-başa çatdığı Qazax rayonunun Birinci Şıxlı kəndində izdihamla torpağa tapşırılır. Ailəli idi, Elay adında bir oğlu və Nilay adında bir qızı yadigar qalıb.
Dövlət təltifləri
Sağlığında aldığı təltiflər:
"Qüsursuz xidmətə görə" 3-cü dərəcəli medalı
"Azərbaycan Silahlı Qüvvələrinin 95 illiyi" yubiley medalı
"Azərbaycan Ordusunun 100 illiyi" yubiley medalı
Ölümündən sonrakı təltifləri:
3-cü dərəcəli "Rəşadət" ordeni
"Vətən uğrunda" medalı
"İgidliyə görə" medalı
"Kəlbəcərin azad olunmasına görə" medalı
“Ədəbiyyat və incəsənət”
(02.10.2026)
