Beynəlxalq Türk Mədəniyyəti və İrsi Fondunun prezidenti Günay Əfəndiyeva Qırğızıstana səfəri çərçivəsində bu ölkənin mədəniyyət, informasiya, idman və gənclər siyasəti naziri Altınbek Maksutov ilə görüşüb. Bu barədə “Ədəbiyyat və incəsənət” portalı Fonda istinadən məlumat verir.
Görüşdə Fondun çoxşaxəli fəaliyyətlərindən, eləcə də təşkilatın qurucu üzv ölkələrindən olan Qırğız Respublikasının 2023-cü il üçün təklif etdiyi layihələrə dəstək verməsindən söz açılıb.
Bu ilin mayında Oşda təşkil olunan VII Beynəlxalq Dünya Xalqlarının Dastanları Festivalının uğurla keçirilməsi qeyd edilib. Fond tərəfindən böyük qırğız yazıçısı Çingiz Aytmatovun 95 illiyi münasibətilə “Ana tarla” əsəri əsasında tamaşanın Azərbaycan dilində hazırlanması və yubileyin qeyd olunması çərçivəsində nümayişi vurğulanıb. Azərbaycanın görkəmli alimi və manasşünası Adil Cəmilin müəllifi olduğu “Manas dastanı və türk dastançılıq ənənələri” adlı kitabın Azərbaycan və qırğız dillərində nəşr olunduğu diqqətə çatdırılıb. Fond və Türk Akademiyasının birgə əməkdaşlığı ilə tanınmış qırğız manasçı Rısbay İsakovun redaktorluğu ilə “Sağımbaydin Manası” kitabının yayımlanması, eləcə də Qırğızıstanın iştirakı ilə təşkilatın digər layihələrinin uğurla həyata keçirildiyi bildirilib.
Nazir Altınbek Maksutov Fondun fəaliyyətini yüksək qiymətləndirərək, təşkilatla gələcək birgə layihələrə dəstəyini ifadə edib.
Görüşdə qarşılıqlı əməkdaşlığın gələcək perspektivlərinə dair fikir mübadiləsi aparılıb.
“Ədəbiyyat və incəsənət”
(03.10.2023)
