Ötən gün İkinci Dünya müharibəsində şərəfli döyüş yolu keçmiş, iki dəfə Sovet İttifaqı Qəhrəmanı, general Həzi Aslanovun 115 illik yubileyi tamam oldu. Gənc nəsil üçün vətənpərvərlik və qəhrəmanlıq nümunəsi olan Həzi Aslanovun xatirəsinin yaşadılması məqsədilə Cəfər Cabbarlı adına Respublika Gənclər Kitabxanasında “Əfsanəvi sərkərdə, unudulmaz qəhrəman” adlı vəsait və virtual kitab sərgisi hazırlanıb.

“Ədəbiyyat və incəsənət” portalına kitabxanadan verilən məlumata görə, hazırlanan materiallarda vaxtilə Həzi Aslanovun 110 illiyinin qeyd edilməsi haqqında Azərbaycan Respublikası Prezidentinin Sərəncamının tam mətni, general Həzi Aslanovun həyat və hərbi fəaliyyətindən, İkinci Dünya Müharibəsi zamanı nümayiş etdirdiyi misilsiz qəhrəmanlıqdan bəhs edən “İkinci Dünya Müharibəsinin “dəmir pələngi”” başlıqlı mətn, layiq görüldüyü orden, medal və fəxri adlar, xatirəsinin əbədiləşdirilməsi haqda məlumatlar təqdim edilir. Kitabxana əməkdaşları tərəfindən hazırlanan vəsaitdə general Həzi Aslanova həsr olunmuş əsərlərin, həyatının motivləri əsasında çəkilmiş filmlərin siyahısı, bir sıra görkəmli şəxslərin onun haqqında söylədikləri dəyərli fikirlər də yer alır. “Əfsanəvi sərkərdə, unudulmaz qəhrəman” adlı vəsaitdə Sovet İttifaqı Qəhrəmanı Həzi Aslanov haqda dərc edilən məqalələrin, virtual kitab sərgisində isə “Həyatı ilə əbədi şöhrət qazanan böyük sərkərdə”, “Azərbaycan SSR 1941-1945-ci illər müharibəsində”, “Sərkərdənin taleyi”, “Vətənin şöhrətini ucaldanlar”, “Qəhrəman Həzi” kimi kitabların biblioqrafik təsviri və qısa annotasiyası sərgilənir.

Sovet İttifaqı Qəhrəmanı, general Həzi Aslanovun 115 illik yubileyi ilə əlaqədar hazırlanan materiallar kitabxananın rəsmi saytında yerləşdirilib.

“Ədəbiyyat və incəsənət”

(23.01.2025)