Ötən gün müasir poeziyamızın görkəmli nümayəndəsi, sevimli şair, Əməkdar mədəniyyət işçisi Məmməd Aslanın anadan olmasının 85 illik yubileyi tamam oldu. Bu münasibətlə Cəfər Cabbarlı adına Respublika Gənclər Kitabxanasında şairin həyat və yaradıcılıq yolundan bəhs edən virtual kitab sərgisi hazırlanıb. 

“Ədəbiyyat və incəsənət” portalına kitabxanadan verilən məlumata görə, virtual sərgidə Məmməd Aslanın pedaqoji, tərcüməçilik fəaliyyəti, "Yenilik", "Azərbaycan gəncləri", "Ədabiyyat və incəsənət" qəzetlərinin,  "Ulduz", "Azərbaycan təbiəti" jurnallarının redaksiyalarında işləməsi, "Yazıçı" nəşriyyatında böyük redaktor, Azərbaycan Dövlət Teleşirkətinin, "Ekran-Efir" qəzetinin baş redaktoru olması haqda məlumat verilir.

Kitabxananın rəsmi saytında https://ryl.az/multimedia/memmed-aslan-85  yerləşdirilən virtual kitab sərgisində şairin “Seçilmiş əsərləri”, “Varlıqla yoxluq arasında”, “Ağla, qərənfil ağla”, “Sözün özü”, “Səhəri kim açır” kimi kitabların qısa annotasiyası təqdim edilir,  dövrü mətbuat nümunələri, Məmməd Aslanın müxtəlif illərdə tədbirlərdə, görüşlərdə çəkilən foto şəkilləri sərgilənir.

“Ədəbiyyat və incəsənət”

(25.12.2024)