Rubrikanı Könül aparır. 

“Ədəbiyyat və incəsənət” portalının Azərbaycan Milli Kulinariya Assosiasiyası ilə birgə layihəsində sizlərə hər dəfə İrəvan mətbəxindən nümunələr təqdim edirik. Bu nümunələr Azərbaycanın bu sahə üzrə tanınmış mütəxəssisi, əməkdar mədəniyyət işçisi, tarix üzrə fəlsəfə doktoru, kulinar Tahir Əmiraslanovun gərgin əməyi nəticəsində ortaya çıxmışdır. 

Bu gün sizlərə Ev ördəyi bozbaşının hazırlanma qaydasını təqdim edəcəyik.

DÜSTUR (nüsxə):

§ Ördək – 190 qr

§ Kərə yağı – 35 qr

§ Noxud – 30 qr

§ Soğan – 30 qr

§ Xırda soğan – 30 qr

§ Kartof – 70 qr

§ Pomidor – 60 qr

§ Təzə alça – 20 qr

(və ya quru alça – 10 qr)

§ Mərzə və ya reyhan qurusu – 3 qr

§ Sarıkök – 1 qr

§ Duz – 6 qr

§ İstiot – 0,05 qr

Xörək əlavəsi:

§ göyərti – 20 qr, sumaq – 10 qr, meyvə turşuları – 50 qr

HAZIRLANMASI:

Təmizlənmiş ördək ütülür, doğranır, yuyulur. Ördək bir gün ərzində duzlu suda saxlansa, daha yaxşı olar. Qazana qoyulur, üzərinə su əlavə olunur və bişirilir. Qaynadıqda kəfi alınır. Qazana bir ədəd qabıqlı baş soğan əlavə olunur. Ət bişənə yaxın soğan çıxarılır, ət sudan ayrılır və işgənəsi süzülür. Eyni qazanda yağ qızdırılır, ördək əti tərəvəzlərlə birlikdə tovlanır. Sonra qabığı təmizlənmiş pomidor, alça, duz, sarıkök, quru mərzə əlavə olunur, qarışdırılır, sonra isə ayrıca bişmiş noxud, işgənə əlavə olunur və bişməyə qoyulur. Hazır olduqda kasaya və ya dərin boşqaba çəkilir, üzərinə reyhan qurusu səpilir və süfrəyə verilir. Yanında tər göyərtilər, əzilmiş qırmızı baş soğan, sumaq, meyvə turşuları (məti) verilir.

Mövsümündə heyva da əlavə oluna bilər.

Nuş olsun!

“Ədəbiyyat və incəsənət”

(13.05.2024)