Dünən Mərkəzi Asiyanın ən böyük “Avrasiya” XVII Beynəlxalq Film Festivalı Almatıda dünyanın hər yerindən rejissorlar, aktyorlar, ssenaristlər və kino bilicilərini bir araya gətirib.
Festival noyabrın 30-dək davam edəcək. Onun təsisçisi və təşkilatçısı Qazaxıstan Respublikasının Mədəniyyət və İnformasiya Nazirliyidir. Film festivalının təşkili Şaken Aymanov adına “Qazaxfilm” Milli Kinostudiyasına həvalə olunub.
Builki filmləri unikal kino ənənələri olan ölkələr təqdim edir. İştirakçılar arasında Azərbaycan və evsahibi Qazaxıstandan başqa Qırğızıstan, Özbəkistan, Tacikistan, Türkmənistan, Türkiyə, İran, Belarus və Rusiya yer alıb. Proqrama miqrasiya və şəxsiyyət axtarışının aktual mövzularını qaldıran ekran əsərləri daxildir.
Film festivalı proqramı nadir hallarda geniş yayılan, lakin mütləq öz tamaşaçılarını tapacaq filmlər üçün platforma təqdim edir. Bundan əlavə, sabahdan etibarən festival çərçivəsində prodüserlik, ssenaristlik və kinematoqrafiya üzrə ustad dərsləri təşkil olunacaq.
“Ədəbiyyat və incəsənət”
(25.11.2024)
