İnci Məmmədzadə,
“Ədəbiyyat və incəsənət” portalının Xəbərlər və Təqvim şöbəsi
Uilyam Sidni Qrem (19 noyabr 1918 – 9 yanvar 1986) — şotland şairi, XX əsr Britaniya poeziyasının diqqətəlayiq nümayəndələrindən biridir. O, daha çox dilin imkanlarını, insan düşüncəsini, ünsiyyəti və həyatın fəlsəfi tərəflərini əks etdirən mürəkkəb, poetik əsərləri ilə tanınır. Uilyam Sidni Qrem 19 noyabr 1918-ci ildə Şotlandiyanın Qrinok şəhərində fəhlə ailəsində anadan olub. Atası gəmiqayırma sahəsində çalışırdı.
O, ilk təhsilini başa vurduqdan sonra mühəndislik sahəsində işləməyə başlayıb. Qlazqoda mühəndislik üzrə təhsil alıb, eyni zamanda ədəbiyyat və fəlsəfə ilə maraqlanıb. 1938–1939-cu illərdə Edinburq yaxınlığındakı Nyubatl Ebbey təhsil müəssisəsində oxuyub. Məhz həmin dövrdə poeziyaya marağı daha da güclənib.
1942-ci ildə ilk şeir toplusu olan Cage Without Grievance nəşr edilib. Sonralar onun yaradıcılığı məşhur şair və yazıçıların diqqətini cəlb edib. Xüsusilə T. S. Eliot onun ədəbi fəaliyyətinin inkişafında mühüm rol oynayıb. 1947-ci ildə ədəbiyyat sahəsində Atlantik mükafatına layiq görülüb və bir müddət Nyu-York Universitetində mühazirələr oxuyub.
1954-cü ildə Aqnes Dunsmuirlə (Nessi Dunsmuir) ailə həyatı qurub. Ömrünün böyük hissəsini İngiltərənin Kornuoll bölgəsində keçirib. Qrem 9 yanvar 1986-cı ildə Kornuollda vəfat edib. Ölümündən sonra da onun şeirləri və əlyazmaları nəşr olunaraq oxuculara təqdim edilib. Uilyam Sidni Qremin əsas yaradıcılığı şeir kitablarından və poetik toplulardan ibarətdir.
Cage Without Grievance - Narazılıqsız qəfəs
The Seven Journeys Yeddi - səyahət
2nd Poems - İkinci şeirlər
The Voyages of Alfred Wallis - Alfred Uollisin səyahətləri
The White Threshold - Ağ astana
The Nightfishing - Gecə balıq ovu
That Ye Inherit - Sizin miras aldığınız
Malcolm Mooney's Land - Malkolm Muninin torpağı
Implements in Their Places - Alətlər öz yerlərində
Qremin poeziyasında aşağıdakı mövzular xüsusi yer tutur:
İnsan və cəmiyyət münasibətləri;
Dil və ünsiyyətin fəlsəfəsi;
Tənhalıq və insanın daxili dünyası;
Təbiət, dəniz və sahil həyatı;
Zaman, yaddaş və həyatın mənası.
Onun şeirləri bəzən mürəkkəb poetik quruluşu və simvolik ifadələri ilə seçilir. Şair Harold Pinter Qremin yaradıcılığına böyük hörmət bəsləyən sənət adamlarından biri olub. Uilyam Sidni Qrem sağlığında geniş oxucu kütləsi tərəfindən kifayət qədər tanınmasa da, sonrakı illərdə onun yaradıcılığına maraq artıb.
Bu gün o, XX əsr Şotlandiya və Britaniya poeziyasının özünəməxsus nümayəndələrindən biri hesab olunur. Onun əsərləri ingilis dilində poeziyanın inkişafına, xüsusilə dilin poetik imkanlarının araşdırılmasına verdiyi töhfə ilə seçilir.
“Ədəbiyyat və incəsənət”
(19.11.2026)


