Ülviyyə Əbülfəzqızı,
“Ədəbiyyat və incəsənət” portalının Xüsusi Layihələr şöbəsi
Salam, Ədəbiyyat və İncəsənət" portalının dəyərli izləyiciləri.
Bu gün də bir şairdən "Ruhun pıçıltısı"-nı sizinlə birgə eşidəcəyək.
Beləliklə, qonağımız AYB və AJB-nin üzvü, Prezident təqaüdçüsü, pedaqoq, şair Elnur Uğur Abdiyevdir.
***
Adın andımı ucaltdı,
Səs-səs, heca-heca, qadın!
Ey eşqi duru, dumduru,
Ruhu göytək uca qadın.
Mən Novruz, sənsə səmənim
Həyat varlığı çəmənim!
Məhəbbətim Tanrım mənim,
Sən isə Tanrıça qadın!
Sevgi sözünün şərhində,
Qurban olmaq var əslində.
Elnur Uğurun qəlbində,
Yerin daim uca, qadın!
***
Sevgilərin uduzduğu bu dünyada,
Səni sevdim!
Gözlərimin qarasında ey ağ adam,
Səni sevdim!
Xəyalındır gül qoyduğum eşq heykəli,
Eşqin ətri sən yazılan sözdən gəlir.
Nolsun, məni sevdi çoxu, eh, mən dəli
Səni sevdim!
Sən mənim əhya gecəmsən, adın həyat,
Sənsiz dodaqdan qaçırır dadın həyat!
Sənlə gülür gözlərimdə, qadın, həyat
Səni sevdim!
***
Anamın saçlarında,
Sinəsinin dağının qarı.
Anamın alnında
Övlad arzularının qırışları.
Anamın üzündə körpə qığıltıları
Hələ də gülümsəyir.
Anamın saçlarının ağı
Meydan oxuyur müdrikliyə.
Anamın alnındakı qırışlar
Tale yazılarını alıb mühasirəyə.
Bələyib sevgiyə adımı,
Bu dünyanın sığındığım ilk adamı-qadını
Ana!
Ondan o yana
Nə bir zirvə var, nə ucalıq.
Ömründən yeyə-yeyə ucaldıq.
Qocaldı
Arzularımızı bəsləyə-bəsləyə
Qocaldı özü istəyə-istəyə
Təki mən üzüqara oğlu xoşbəxt olsun deyə.
Bu gün onun gümüş saçlarında
Bu gün onun dərəyə düşmüş alın qırışlarında
Ütülənmiş gəncliyimi gördüm, ürkdüm!
Mən nə boyda yükdüm?
Ömrünü zülmət gecələrimdə şamtək əridən,
Ağrılarımı sevgisiylə kiridən
Ey ali qadın!
Çoxdan yıxılardı
Sənə söykənməsəydi adım!
***
Qadınlar kitab kimidir,
Sevməyə başlamadan,
Oxumağı bacarmalısan.
Detektiv romanlara bənzəməz qadınlar,
Bir- iki günə bitirmək həvəsilə
Oxumağa başlasan,
Elə ilk səhifədə yıxılacaqsan.
İnqilabi romanlara bənzəyir qadınlar,
Hər səhifəsində əzm var!
Başlayanda fəlsəfə ilə açılar ilk səhifə,
Sonra üz tutar təbiətə.
Sevgi yazar hər hərfini,
Bu kitabda səhifə-səhifə səhvini
Oxuyar kişilər.
Bəzən bir vərəqini oxumaz, ötürər,
Bitirəndən sonra anlayar ki,
Həmin ötürdüyü səhifədə bitəcəkmiş
Elə bu əsər.
Qadınlar kitab kimidir,
Nolsun, üzləri müxtəlifdir,
Müəllifi ki sevgidir,
Bu inqilabi əsərin!
Qadınlar kitab kimidir,
Oxuduqca anlayırsan dərin!
Yaşamağa səsləyir qadın həyatı.
Özü üçün yox,
Özgəsi üçün bəsləyir qadın həyatı!
Qadınlar
Elə buna görə inqilabi romandılar!
Özləri üçün yaşamırlar.
Oxu,
Oxu,
Oxu!
Bu Allahın əmri deyil,
Bu qəlbinin səsidir.
Oxu,
Qadın
Tanrının ən böyük möcüzəsidir!!!
“Ədəbiyyat və incəsənət”
(05.11.2026)
