“Ədəbiyyat və incəsənət” portalının Sumqayıt təmsilçisi
Azərbaycan Yazıçılar Birliyinin Sumqayıt bölməsi yarandığı ilk illərdən etibarən, bölmənin rəhbəri, mərhum şair Sabir Sarvanın təşəbbüsü ilə şəhərdə Təhsil idarəsi və Mərkəzi Kitabxana ilə birgə “Söz bayramı” keçirilib. Ədəbi sözə, poeziyaya və gənc istedadların yaradıcılığına diqqəti artırmaq məqsədi daşıyan bu tədbir zaman keçdikcə Sumqayıtın mədəni həyatında özünəməxsus yer tutub.
1999-cu ildən etibarən isə “Söz bayramı” şəhər səviyyəsində qeyd olunmağa başlayıb. Ötən illər ərzində tədbir yalnız ədəbi görüş olmaqdan çıxaraq, Sumqayıtın sözə və sənətə münasibətini nümayiş etdirən ənənəvi poeziya mərasiminə çevrilib. Bu ənənənin bu gün də yaşadılması şəhərin ədəbi mühitinin varisliyindən xəbər verir.
Növbəti “Söz-2026” Poeziya bayramı 1 nömrəli Uşaq-Gənclər İnkişaf Mərkəzində keçirilib.
Ədəbi-bədii tədbiri giriş sözü ilə Mərkəzin direktoru Əntiqə Rzayeva açaraq aparıcı AYB Sumqayıt şəhər bölməsinin sədri Gülnarə Cəmaləddinə söz verib. Sumqayıtın fəxri vətəndaşı, şair Əvəz Mahmud Lələdağ, filologiya elmləri doktoru, şair Rafiq Yusifoğlu, Azərbaycan Jurnalistlər Birliyi Sumqayıt şəhər təşkilatının sədri, şair Rafiq Oday, eləcə də şəhərin tanınmış qələm sahibləri - Əməkdar jurnalist Ətrabə Rzayeva, Asif Asiman, Xəqani Abbasəli Öztürk, Mirzəcan Ağabalayev, İlhamə Məhəmmədqızı, Akif Amal, Hikmət Fərzəli, İlqar Həbibi, Yeganə Hüseynova və başqaları poeziya ilə bağlı öz fikirlərini söyləyib, yaradıcılıq nümunələrini səsləndiriblər. Şeir misralarında Vətən sevgisi, insan duyğuları, həyatın müxtəlif çalarları, doğma şəhərə bağlılıq və zamanın poetik mənzərələri öz ifadəsini tapıb.
Çıxış edənlər sözün insan həyatındakı mənəvi əhəmiyyətindən, poeziyanın insan duyğularının ifadəsindəki rolundan, ədəbi ənənələrin qorunmasının vacibliyindən söz açıblar. Bildirilib ki, belə tədbirlər müxtəlif nəsilləri - sözə yeni başlayan gənclərlə illərin yaradıcılıq təcrübəsini daşıyan qələm sahiblərini eyni məkanda görüşdürməklə ədəbi varisliyin yaşadılmasına xidmət edir.
Səslənən şeirlər isə tədbirə xüsusi ovqat gətirib. Poeziyanın canlı nəfəsi salonu bürüdükcə bir daha aydın olub ki, söz yalnız yazılı mətn deyil. Söz həm də insanları bir araya gətirən, duyğuları yaxınlaşdıran, yaddaşı yaşadan mənəvi körpüdür.
Tədbirin bədii hissəsində yeniyetmə ifaçı Emil Ramazanlı da musiqi nömrəsi ilə çıxış edib. Onun ifası ədəbi görüşə xüsusi rəngi qataraq iştirakçılara xoş ovqat bəxş edib.
“Söz bayramı”nın əsas dəyəri də məhz bundadır: burada söz yalnız səslənmir, yaşadılır. Şeir yalnız oxunmur, duyulur. Ədəbi ənənə yalnız xatırlanmır, gələcək nəsillərə ötürülür.
Sumqayıtın mədəni həyatında özünəməxsus izi olan bu tədbirin uzun illərdir davam etməsi şəhərdə poeziyaya və ədəbi sözə göstərilən diqqətin göstəricisidir. Bir vaxtlar mərhum şair Sabir Sarvanın təşəbbüsü ilə əsası qoyulan ənənənin bu gün də davam etdirilməsi onun ədəbi irsə və sözə xidmət düşüncəsinin yaşadığını göstərir.
“Söz bayramı” həm də müxtəlif nəsillərin görüş yeridir. Burada poeziyanın ustadları ilə gənc qələm sahibləri, ədəbiyyatsevərlər və sənət adamları bir araya gəlir. Belə görüşlər yeni yaradıcılıq əlaqələrinin yaranmasına, gənc istedadların ruhlandırılmasına və şəhərin ədəbi mühitinin daha da canlanmasına mühüm töhfə verir.
Bir sözlə, “Söz-2026” Poeziya bayramı Sumqayıtın ədəbi həyatında növbəti yadda qalan səhifələrdən birinə çevrilib.
Tədbirin sonunda iştirakçılar xatirə şəkli çəkdiriblər.
“Ədəbiyyat və incəsənət”
(02.10.2026)
