İndira Şəmsivari,

Sizi sevən və Sizə hər zaman hörmətlə yanaşan şagirdiniz, Dövlət Qulluğunun Dövlət Müşaviri, Prezident təltifçisi

Var olun, vüqarlı insan! Müəllim, böyük hərflə yazılan əsl Ata, Dost və qürurlu Kişi! Var olun ki, gələcək nəsillərə örnək göstərməyə layiq bir dəyərlimizsiz!

Əvəz müəllim, heç vaxt unutmuram… Tahir müəllimin yubileyinizdə sizin şeirlərinizi əzbər söyləməsi, sizin də bizə o şeirləri əzbərlətməyiniz hələ də yaddaşımdadır. Və bilməyənlərə dediyiniz o söz: “Ağıllı insan çox dillər bilməlidir”, qulaqlarımdan getmir.

Siz, canım Əvəz müəllim, atamın çox qısa zaman dostluq etdiyi, boyu, duruşu, xarakteri atama bənzəyən bir insan kimi mənim üçün çox qiymətlisiniz. Özümü çox xoşbəxt sayıram ki, sizin yetirməniz olmuşam, dağ vüqarlı müəllimim!

Sumqayıtın rəhbəri, hörmətli Zakir müəllimin də dediyi kimi, rəqsi belə özü kimi vüqarlı olan Əvəz müəllim, yaşayın, yaradın! Çünki siz yaşadıqca, Azərbaycan dilində artıq unudulmaqda olan, amma sizinlə yenidən anlam qazanan “Əsl kişi” ifadəsi də yaşayır.

Biz gözümüzü açanda atalarımızı sizin kimi vüqarlı görmüşük. Bir baxışları yetərdi bizə. Ona görə də biz cinayətkar böyümədik. Biz bu sözlərlə böyüdük: “Əldən tutmaq əldən qalıb”, “Kişinin qapısını kişi döyər”, “Əmanətə xəyanət olmaz”.

O illərə, o atalara və o dəyərlərə bu gün cəmiyyətin böyük ehtiyacı var. Və Əvəz müəllim, bizlərin də  əziz Ata, Müəllim, Dost olaraq Sizə çox ehtiyacımız var.

Yubileyiniz mübarək olsun! Allah sizi bədnəzərdən qorusun!

“Ədəbiyyat və incəsənət”

(06.10.2025)