Bakıda 200 manatlıq saxta əsginaslarla yaşlı insanları aldadan şəxs saxlanılıb

Məhərrəm ayı ilə bağlı yaşlı nəslə yardım ediləcəyi adı ilə vətəndaşlardan pul yığılması və saxta əsginaslar təqdim edilməsi ilə əlaqədar sosial şəbəkələrdə yayılan məlumatlar araşdırılıb. 

Bu barədə Daxili İşlər Nazirliyinin mətbuat xidmətindən məlumat verilib.

Bildirilib ki, polis əməkdaşlarının keçirdikləri tədbirlərlə naməlum şəxsin kimliyi müəyyənləşdirilib. Onun 1993-cü il təvəllüdlü Əmrahov Vüsal Tahir oğlu olması məlum olub. Davam etdirilən tədbirlərlə o, saxlanılıb. Həmin şəxsin üzərində 200 manat saxta əsginas aşkarlanıb. 

Vüsal Əmrahovun əməlindən zərərçəkən şəxslərin polisə məlumat vermələri tövsiyə olunur. 

Faktla bağlı araşdırmalar davam etdirilir.

“Ədəbiyyat və incəsənət”

(04.08.2023)