Cari ilin 6 ayında Azərbaycana gələn turistlərin sayı 44 faizə qədər artıb
Növbəti Açıq Portfel xəbərini Dövlət Statistika Komitəsinə istinadən nəzərinizə çatdırırıq. Bu ilin yanvar-iyun aylarında Azərbaycana dünyanın 181 ölkəsindən 918,8 min və ya əvvəlki ilin müvafiq dövrü ilə müqayisədə 43,9 faiz çox əcnəbi və vətəndaşlığı olmayan şəxs gəlib. Düzdür, bu sırada Gürcüstanda, Rusiyada yaşayan həmvətənlilərimiz də var. Amma ümumən götürsək, nəticə çox yüksəkdir.
Ölkəmizə ən çox hansı ölkələrdən gəliblər? Gəlin baxaq.
32,9 faiz Rusiya Federasiyasından;
19,2 faiz Türkiyədən;
7,7 faiz İrandan;
5,2 faiz Hindistandan;
4,9 faiz Gürcüstandan;
2,4 faiz Səudiyyə Ərəbistanından;
2,3 faiz Pakistandan;
2,3 faiz Qazaxıstandan;
2,1 faiz Birləşmiş Ərəb Əmirliklərindən;
1,8 faiz Özbəkistandan;
1,5 faiz Belarusdan;
1,5 faiz Ukraynadan;
1,3 faizi Küveytdən;
1,2 faiz Böyük Britaniyadan;
1,2 faiz Türkmənistandan;
12,5 faiz digər öllələrdən.
Gələnlərin 72,2 faizini kişilər, 27,8 faizini qadınlar təşkil etmişdir.
Ötən ilin eyni dövrü ilə müqayisədə Çindən gələnlərin sayı 7,2, Türkmənistandan 3,9, Hindistandan 3,1, Belarusdan 2,3, Özbəkistandan 2,2, Qazaxıstandan 1,9, Rusiya Federasiyasından 1,9, İsraildən 1,6 dəfə, ABŞ-dan 44,2 faiz, Küveytdən 37,2 faiz, Gürcüstandan 35,5 faiz, Böyük Britaniyadan 34,6 faiz, Birləşmiş Ərəb Əmirliklərindən 22,7 faiz, Pakistandan 16,1 faiz, Türkiyədən 15,9 faiz artıb, Səudiyyə Ərəbistanından gələnlərin sayı 23,6 faiz, İrandan 14,9 faiz, Omandan 9,9 faiz, Ukraynadan 6,2 faiz azalıb.
2022-ci ilin yanvar-iyun ayları ilə müqayisədə MDB ölkələrindən gələnlərin sayı 1,9 dəfə artaraq 385,8 min nəfər, Avropa İttifaqına üzv ölkələrdən gələnlərin sayı 40,0 faiz artaraq 46,7 min nəfər, körfəz ölkələrindən gələnlərin sayı 8,9 faiz azalaraq 134,2 min nəfər olub.
Ölkəmizə gələn əcnəbilər və vətəndaşlığı olmayan şəxslərin 68,8 faizi hava, 29,8 faizi dəmir yolu və avtomobil, 1,4 faizi isə dəniz nəqliyyatından istifadə etmişdir.
2022-ci ilin yanvar-iyun ayları ilə müqayisədə xarici ölkələrə gedən Azərbaycan Respublikası vətəndaşlarının ümumi sayı 16,3 faiz artaraq 791,7 min nəfər olub. Rusiya Federasiyasına gedən Azərbaycan Respublikası vətəndaşlarının sayı 1,8 dəfə, Gürcüstana gedənlərin sayı 34,5 faiz artıb, İrana gedənlərin sayı 31,0 faiz, Türkiyəyə gedənlərin sayı 1,9 faiz azalıb. Ölkə vətəndaşlarının 40,2 faizi Türkiyəyə, 23,9 faizi Rusiya Federasiyasına, 9,4 faizi Gürcüstana, 7,9 faizi İrana, 18,6 faizi digər ölkələrə səfər edib. Gedənlərin 68,3 faizini kişilər, 31,7 faizini qadınlar təşkil etmişdir.
Cari ilin yanvar-iyun aylarında xarici ölkələrə səfər edən Azərbaycan Respublikası vətəndaşlarının 67,3 faizi hava, 29,9 faizi dəmir yolu və avtomobil, 2,8 faizi isə dəniz nəqliyyatından istifadə etmişdir.
“Ədəbiyyat və incəsənət”
(18.07.2023)
