Nigar Həsən-zadə, “Ədəbiyyat və incəsənət”
25 noyabr 2024-cü il Maştağa ziyalısı- Məhərrəm İmamverdi oğlu Həsənzadənin əbədi həyata qovuşmasından 1-il ötür.
Bakı şəhərinin ən böyük yaşayış məskənlərindən biri hesab edilən Maştağa kəndi (sonradan qəsəbəyə çevrilib) çox qədim bir tarixə malikdir. Bu qədim yurdda Vətənimizin, xalqımızın qədim və gözəl adət-ənənələri, inam və etiqadları, mifoloji təsəvvürləri, şifahi ədəbiyyatı qorunub saxlanmaqdadır. Daha doğrusu, kəndin əhalisi bütün bunları nəsilbənəsil bir-birinə ötürür və ən gözəl ərməğan kimi bu gün də yaşadır.
"Maştağa" sözü, bu kəndin özündən əvvəl dünyaya gəlib. Görkəmli Azərbaycan tarixçisi Abbasqulu ağa Bakıxanov "Gülüstani-İrəm" əsərində "Maştağa" toponiminin "massaget"sözündən yaranması fikrini irəli sürmüşdür.
Bu qədim və dəyərli ocaq əsrlər boyu ziyalılar yetişdirmişdir.
Bu ziyalılardan biri də mənim babam- Həci Məhərrəm İmamverdi oğlu Həsənzadə olmuşdur. Məhərrəm müəllim 1947-ci il 28 yanvar tarixində Maştağada anadan olmuşdur. O, (mənim də məzunu olduğum) 187 saylı orta məktəbi bitirdikdən sonra indiki (hazırda mənim də onun davamçısı kimi təhsil aldığım-bizim ailəyə doğma məkan hesab olunan) Bakı Dövlət Universetinin fizika-riyaziyyat fakültəsinə daxil olmuşdur. Ali təhsilini başa vurduqdan sonra ordu sıralarında baş leytenant olaraq öz xidmət borcunu ödəmiş və Vətənə qayıdaraq məktəbdə fizika-riyaziyyat müəllimi vəzifəsində işləyərək uşaqların təlim və tərbiyəsi ilə məşğul olmuşdur.
Məhərrəm Həsənzadə 1977-ci ildə Maştağa Qəsəbə İcraiyyə Komitəsinin sədr müavini vəzifəsində çalışmışdır. O, bir müddət bu vəzifədə işləyərək təcrübə toplamış və 1982-ci ildə Maştağa qəsəbə İcraiyyə Komitəsinin sədri vəzifəsinə təyin olunmuşdur.
Məhərrəm Həsənzadə 1987-ci ilə qədər bu vəzifədə işləmişdir. O, 1988-ci ildən 108-saylı orta məktəbdə pedaqoji fəaliyyətini davam etdirir. O, məktəbin direktoru kimi və kəndimizin ziyalımısı kimi bu qəsəbədə böyük nüfuza malik idi.
12 dekabr 1999-cu il respublika bələdiyyə seçkilərində iştirak edən Məhərrəm müəllim Həsənzadə Maştağa bələdiyyəsi üzvlüyünə öz namizədliyini vermiş və Maştağa bələdiyyəsi üzvü seçilmişdir. O, bələdiyyənin Yerli sosial inkşaf daimi komissiyasının sədri olmuşdur.
3 övladı (biri rəhmətə gedib), 7 nəvəsi, 3 nəticəsi var.
Təəssüf ki, keçən qış həqiqətən də bizim ailəyə mənəvi olaraq da qış gətirdi. Biz 25 noyabr 2023-cü il ailəmizin babasını, məsləhətçimizi, kəndimizin ziyalısını, bir sözlə, müəllimlər müəllimini itirdik.
Əziz babam-Həci Məhərrəm müəllim, ruhun şad, məkanın cənnət olsun! Ali məktəbə daxil olmağımı görmək sənə qismət olmasa da, əminəm ki, bundan xəbərdarsan və ruhun şaddır!
Bu gün sənin haqqında yazdığım bu məqaləni jurnalist olaraq yazmaq isə mənə çox böyük qürurdur. Çox istəyərdim ki, sən sağ olasan və 28 yanvar doğum gününə həsr edim bu məqaləni, amma nə etmək olar ki, hər dəfə bizim istədiklərimiz olmur.
Məhz sənin bitirdiyin Ali məktəbə daxil olmağım isə hamımızın könlünü daha da xoş etdi, əminik ki, bu hal sənin ruhunu daha da şad etmişdir.
Mənə və digər nəvələrinə tək baba yox, həm də mənəvi müəllim idi.
Etika qaydalarını, gündəlik məişətdə istifadə olunan yazılmamış qanunları daha da yaxşı mənimsəməyimizə dəstək olurdu. Biz onunla hər zaman fəxr edirdik! İndi də onun bizi cənnətdən izləyib fəxr etdiyinə əminəm!
“Ədəbiyyat və incəsənət”
(25.11.2024)
