Cəfər Cabbarlı adına Respublika Gənclər Kitabxanasında “Təmiz planet-sağlam həyat” layihəsi çərçivəsində reallaşan tədbirlər davam edir. Artıq 10 gündən çoxdur ki Azərbaycan dünyanın ən böyük və mühüm dövlətlərarası tədbirlərindən biri olan COP29-a ev sahibliyi edir.

Birləşmiş Millətlər Təşkilatının (BMT) İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası çərçivəsində 100-lərlə görüşlər, əhəmiyyətli tədbir və müzakirələr keçirilib. Bununla əlaqədar olaraq Cəfər Cabbarlı adına Respublika Gənclər Kitabxanasının rəsmi saytında  “COP 29-un gündəliyi” adlı bölmə yaradılıb.

“Ədəbiyyat və incəsənət” portalına kitabxanadan verilən məlumata görə, bölmə özündə xronoloji ardıcılıqla COP29 çərçivəsində keçirilən görüşlərin, tədbirlərin internet məkanında olan keçidlərini cəmləyir. Tam mətnlərə əsaslanan bu keçidlərdən ibarət olan elektron resurslar bazası özündə Azərbaycan Respublikasının Prezidenti İlham Əliyevin COP29-la əlaqədar keçirdiyi bütün görüşləri və çıxışları cəmləyir. Kitabxananın rəsmi saytında yerləşdirilən resurslar bazasına https://ryl.az/activity/COP_gundelik  əlavələrin davam etdirilməsi irəliləyən günlərdə də nəzərdə tutulur.

Onu da qeyd etmək lazımdır ki, “COP 29-un gündəliyi” ilə yanaşı kitabxananın rəsmi saytında olan “Yaşıl dünya naminə həmrəylik ili” adlı elektron resurslar bazası da öz fəaliyyətini davam etdirir. Bu günə kimi, bu bazada 180-dən çox məqalənin tam mətni yerləşdirilib. “Yaşıl dünya naminə həmrəylik ili” adlı elektron resurslar bazasına  https://ryl.az/activity/yashil_dunya linkinə keçid etməklə baxmaq olar.

“Ədəbiyyat və incəsənət”

(22.11.2024)