Cəfər Cabbarlı adına Respublika Gənclər Kitabxanasında XX əsr Azərbaycan ədəbiyyatının görkəmli nümayəndəsi, Əməkdar incəsənət xadimi, Dövlət mükafatı laureatı, Xalq yazıçısı İlyas Əfəndiyevin 110 illik yubileyi münasibətilə ənənəvi və virtual kitab sərgisi hazırlanıb. 

“Ədəbiyyat və incəsənət” portakına kitabxanadan verilən məlumata görə, virtual sərgidə görkəmli yazıçının həyat və yaradıcılığı, ictimai fəaliyyəti, müəllifi olduğu əsərlər haqqında geniş məlumat verilib. Sərgidə Ulu Öndər Heydər Əliyevin, Xalq şairləri Səməd Vurğun, Mirvarid Dilbazi kimi görkəmli şəxslərin dramaturq haqqında söylədikləri dəyərli fikirlər yer alır. Materialda yazıçının çoxşaxəli yaradıcılığı, müəllifi olduğu “Söyüdlü arx”, “Dağlar arxasında üç dost”, “Körpüsalanlar”, “Üç silah”, “Xurşidbanu Natəvan” kimi ona milyonlarla oxucunun rəğbətini qazandıran əsərləri haqqında məlumat verilir. Virtual sərgidə pyesləri ilə teatr sənətimizdə yeni bir mərhələ açan İlyas Əfəndiyevin “Dövlət mükafatı” na layiq görülmüş “Mahnı dağlarda qaldı” pyesindən fraqmentlər, yazıçının şəxsi foto və video arxivindən görüntülər təqdim edilir.

“İlyas Əfəndiyev - 110” adlı ənənəvi kitab sərgisində müəllifin kitabxana fondunda olan və geniş oxucu kütləsi tərəfindən sevilərək mütaliə edilən kitabları və kitabxana əməkdaşları tərəfindən hazırlanan eyniadlı ədəbiyyat siyahısı nümayiş olunub.

Virtual kitab sərgisi kitabxananın rəsmi saytında https://ryl.az/multimedia/ilyas-efendiyev-110 yerləşdirilib.

 “Ədəbiyyat və incəsənət”

(27.05.2024)