Elman Eldaroğlu, “Ədəbiyyat və incəsənət”

Molla Qələm axund kimi tanınan Qasımov Qulamrza Məhəmmədrza oğlu 1883-cü ildə Lerik rayonunun Zenoni kəndində dünyaya gəlib. İlk ruhani təhsilini 10 il Xorasanda alan Qulamrza daha sonra Nəcəfül-Əşrəfdə 3 il, Mədinədə isə 4 il qalaraq İslam elmlərinə dərindən yiyələnmib. 

Xorasanda təhsil alarkən gözəl hüsn-xəttə malik olduğu üçün ustadları ona “Qələm” ləqəbi veriblər. 

Molla Qələm axund 3 qız, Əhməd və Rzaxan adlı 2 oğul atası olub. 

Oğlanlarından biri Bakıda ali təhsil alarkən kimsə axunda çatdırır ki, oğlun şərab içir. Axund- ola bilməz!- söyləyib inanmadığını deyir. Bu hal bir neçə dəfə baş verəndən sonra axund deyib:

-Mənim oğlum gözünü açıb evdə "Allahu əkbər", "Bismillah" kəlmələrini eşidib. Və bu kəlmələrlə böyüyüb. Mənim tərbiyəmi almış adam heç vaxt harama əl uzatmaz, inanmıram. Yəqin günah onu əhatə edən yoldaşlarındadır. Allah üzlərini qara eləsin!

Ruhu şad olsun!

P.S. Leriklilər rəhmətliyin 140 illiyi ilə bağlı süfrə açıb imkansızlara ehsan versələr gözəl olar. Və ya “Quranın qiraəti” müsabiqəsi keçirə bilərlər. Axı molla Qələm axund Lerikin fəxridir…

“Ədəbiyyat və incəsənət”

(01.09.2023)