Ramil Zeynallı, “Ədəbiyyat və incəsənət” üçün

Sumqayıtın bu ilin noyabrın 22-də şəhər statusu almasının 75 ili tamam olur. Bu gündən sizlərlə Sumqayıt haqqında maraqlı faktları bölüşəcəm. 

1936-cı ildə Sumqayıtda ilk tikililər, baraklar meydana gəlib.

1939-cu il Bakı Sovetinin Sumqayıt rayonu üzrə təşkilat bürosunun iclasında Sumqayıt rayonunun yeni təşkil olunması nəzərə alınaraq 1939-cu il üçün 3 milyon 597 min 24 rubl məbləğində təxmini smeta təsdiq olunub.

Buraya 3 mərtəbəli 32 mənzilli yaşayış evi, 20 çarpayılıq xəstəxana, 10 siniflik məktəb, rayon soveti, rayon komitəsi və milis idarəsi üçün binalar, yataqxana, 3 avtomaşınlıq qaraj, 35 at üçün tövlə tikilməsi daxil edilib.

1940-cı ildə Bakı Sovetinin fevralın 20-də keçirilən iclasında Sumqayıt rayonunun Corat qəsəbəsinin “Qırmızı oktyabr” kolxozundan Sumqayıt şəhərinə yer vermək haqqında qərar çıxarılıb.

Daimi istifadədən ötrü kolxozun torpağından kolxozçuların razılığı ilə 2500 hektara qədər yer ayrılıb sosializm rayon mərkəzinə (Sumqayıt rayon mərkəzi nəzərdə tutulur) verilib.

“Ədəbiyyat və incəsənət”

(24.10.2024)