SƏBƏBİ HARRİ POTTERDİR

Adətən qədimi kitablar əntiq hesab edilərək hırracda baha qiymətə satılır. Amma bu dəfə cəmi 26 yaşı olan kitab satış rekordu vurub. “Ədəbiyyat və incəsənət” portalı TASS agentliyinə istinadən xəbər verir ki, 1997-ci ildə 36 sentə alınan Coan K.Roulinqin "Harri Potter və fəlsəfə daşı" kitabının ilk nəşri hərracda rekord məbləğə satılıb.

Sözügedən kitab İngiltərədə 10,5 min funt-sterlinqə (13,5 min dollar) alınıb. Bu barədə “Richard Winterton Auctioneers” hərrac evi məlumat yayıb.

Ekspertlər Harri Potterdən bəhs edən bu kitabın 1997-ci ildə çap olunmuş 500 nüsxədən biri olduğunu təsdiqləyiblər. Bunlardan 300-ü İngiltərədəki kitabxanalara göndərilib və yalnız 200 ədədi satışa çıxarılıb.

Qeyd edək ki, 2017-ci ildə Coan K.Roulinq tərəfindən imzalanmış Harri Potter haqqında kitabın ilk nəşrlərindən biri Londonda “Bonhams” hərrac evində 106 min funt-sterlinqə (140 min dollar) satılıb. Roulinqin bu əsəri əsasında ondan çox film çəkilib. 

“Ədəbiyyat və incəsənət”

(12.07.2023)