“Avroviziya 2023” müsabiqəsinin Azərbaycan üzrə seçimi gərginliklərlə yadda qalır və seçim tutunu adlaya bilməyənlərin sosial mediada təşkilatçıları qeyri-obyektivlikdə qınamaları davam edir. Təşkilatçıların rəsmi cavabını da Azərbaycanın “Avroviziya”da nümayəndə heyətinin mətbuat katibi İlahə Dadaşovanın timsalında ötən gün dərc etmişdik. 

Nümayəndə heyətimiz növbəti açıqlama yayıb, qeyd edib ki, builki seçim zamanı mahnı müəlliflərinin azərbaycanlı olmasına xüsusi diqqət ayrılıb. Bu amillə yanaşı, digər parametrlər də nəzərə alınaraq, 5 ifaçı və onların mahnıları seçilib. Həmin istedadlı musiqiçilər - Leyla İzzətova, Humay Aslanova və Əmrah Musayev dueti, “Mamagama” qrupu, Turan və Tural Bağmanovlar dueti və Azər Nəsibovdur.

“Mahnıların səsyazma keyfiyyəti baxımından fərqli olmasının yekun qərara təsir etməməsi və sağlam rəqabət imkanının təmin edilməsi üçün bu 5 namizədin ifaları eyni səsyazma studiyasında və eyni şəraitdə işlənilib. Səsyazmadan sonra canlı ifalarının videoçəkilişləri edilib. Performansların hər iki formatda (yazılmış audio və canlı video) fokus qruppasına təqdim edilməsi nəzərdə tutulub. Hazırda həmin videolar üzərində iş gedir”,-deyə İ.Dadaşova bildirib.

Şəkildə: Əsas iddiaçılardan hesab edilən Humay Aslanova və Əmrah Musayev dueti

“Ədəbiyyat və incəsənət”

(03.02.2023)