“Ədəbiyyat və incəsənət” portalı yazıçı-dramaturq Əyyub Qiyasın tanınmış teatr və kino xadimlərinin həyatlarından qələmə aldığı maraqlı anları təqdim edir. Növbəti təqdim edilən Hacıbaba Bağırovdur.
HACIBABA BAĞIROV
(1932-2006)
***
Xəstə vaxtlarım idi. Teatrda “Bankir adaxlı” tamaşası gedirdi. Biletlərin hamısı satılmışdı, mənsə xəstəxanada müalicə alırdım.
Tamaşaya iki saat qalmış xəstəxanadakı palatada ayağa qalxıb geyinməyə başladım. Həkim içəri girəndə geyindiyimi görüb başını buladı.
– Nə edirsiz, Hacıbaba müəllim, sizə ayağa qalxmaq olmaz.
– Mən teatra getməliyəm, axşam tamaşam var.
– Siz tamaşanı düşünürsüz, biz isə sizi. Olmaz! Ölərsiz!
Həkimə baxıb gülümsədim:
– Öləndə də heç olmasa səhnədə ölərəm, daha xəstəxana palatasında yox, – deyib, xəstəxananı tərk etdim.
“Ədəbiyyat və incəsənət”
(24.01.2023)
