“Seçilmişlər” rubrikasında Elman Eldaroğlu sizlərə npvbəti seçilmişi təqdim edir.
Qayğıkeş adamdır. İmkanlarını bölüşməyi bacarır. Xeyli dostları var. Mübahisə etməyi xoşlamır. Bu da ona insanlarla münasibətdə sevgi və şöhrət gətirir. Həyatda nəyinsə həddindən artıq olmasını arzulamır, tünlükdən, gündəmə düşməkdən yayınır…
Haqqında söhbət açmaq istədiyim Vüqar Zifəroğlu 1978-ci ildə Bakı şəhərində anadan olub. 1995-ci ildə 190 № orta məktəbi bitirdikdən sonra Bakı Dövlət Universiteti Beynəlxalq jurnalistika ixtisasına qəbul olunub. Həmin ixtisas üzrə 1999-cu ildə fərqlənmə diplomu ilə bakalavr, 2001-ci ildə isə yüksək nəticələrlə magistr pillələrini bitirib. 1997-ci ildən mediada analitik və araşdırma məqalələrilə çıxış edir. Eyni zamanda müxtəlif televiziya kanallarına ekspert olaraq dəvət olunur.
2001-ci ildən BDU-nun Jurnalistika fakültəsində çalışırır. 2001-2004-cü illərdə jurnalistikanın nəzəriyyəsi və təcrübəsi kafedrasında, 2004-2006-cı illərdə isə beynəlxalq jurnalistika kafedrasında baş laborant vəzifəsində çalışıb. 2006-cı ildən Beynəlxalq jurnalistika kafedrasının müəllimi, 2011-ci ildən dosentidir. 2010-2017-ci illərdə “Jurnalistika” Elmi Tədqiqat Laboratoriyasını müdiri-aparıcı elmi işçi vəzifəsində çalışıb. 2017-ci ilin may ayından Jurnalistika fakültəsinin dekanıdır. 2005-ci ildə jurnalistika ixtisası üzrə elmi iş müdafiə edərək, filologiya elmləri namizədi, 2017-ci ildə isə yenə də həmin ixtisas üzrə doktorluq dissertasiyasını müdafiə edərək, Filologiya elmləri doktoru alimlik dərəcələrinə yiyələnib.
“Əməkdar jurnalist” fəxri adına layıq görülüb…
Yüksək bilik, mütaliə istedadın cövhəridir. İfadə olunan fikri cilalayıb, məzmununa xüsusi rəng qatır. Vüqar Zifəroğlu məhz bu keyfiyyətləri sayəsində uğurlara imza atıb və jurnalistikanın işıqlı simalarından biri kimi tanınır. Bir neçə kitabın müəllifidir…
Tapdım! O, böyüklüyə tərəf gedən yolun zəvvarıdır. İbadətin qəbul olsun, professor!..
