Habil Yaşar, “Ədəbiyyat və incəsənət”
Elmira ismayılova (Camalova) 1949-cu ildə İsmayıllı rayonunun Tircan kəndində anadan olub. Azərbaycan dili və ədəbiyyatı müəlliməsidir. Hal-hazırda təqaüddədir. Üç övladı, iki nəvəsi var.
Elmira xanımla tanışlığım Ülviyyə Əbülfəzqızının “Ruhumun nəğməsi” adlı ilk şeirlər kitabının təqdimatı zamanı başladı. Azacıq ünsiyyətdən sonra onun necə səmimi bir insan olduğunun fərqinə vardım. Zəmanəmizdə nadirən belə insanlar tapılar. “Möcüzəli faktlarla” kitabını mənə təqdim edən zaman ruhunun səsini eşidirdim sanki. O ruh ki, bir ömür boyu sözün əsl mənasında möcüzələrə şahid olmuş, hər kəsə nəsib olmayan bir həyat yaşamışdı. Ah necə bir həyat...
“Möcüzəli faktlarla” zəngin olan bu kitabın taleyi çox təəssüf ki, olduqca talesiz olmuşdu-biganəlikdən, görməzlikdən və bəlkə də qısqanclıqdan...
Kitabı vərəqləyərkən özümü möcüzələr diyarında hiss edirdim sanki... Kitab məni həyatın dərinliklərinə baş vurdurmuş, ruhumu sarsıtmışdı. Bir insanın həyatında bu dərəcədə möcüzələr olarmı ilahi?... Hansı sətrə biganə yanaşasan, hansı vərəqi ötəri keçəsən, hansı möcüzəni unutmağı bacarasan... Bu kitabda yazılanları azacıq da olsun duymaq üçün oxumaq gərək və ən əsası ürək gərək, ürək... Zatən ürək yoxsa milyon dəfə oxusan nə yarar. Müxtəsərcə çox təsirləndim bu kitabdan. Və bu kitabın daha böyük oxucu auditoriyasına çatdırılması gərək. Xüsusən gənclər bu kitabdan daha çox faydalanmalıdır, düşünürəm. Həqiqətləri, xoşbəxtliyi, həyatın mənasını dərk eləmək üçün bu kitab o qədər əlverişlidir ki...
Sonda Elmira xanıma daha böyük uğurlar, uzun ömür, can sağlığı arzulayır, kitabının da gec-tez minlərin sevimlisinə çevriləcəyinə inanıram...
“Ədəbiyyat və incəsənət”
(12.07.2023)
