Sabah paytaxtın İncəsənət Muzeyində yazıçı Adəm İsmayıl Bakuvinin “Paris üçbucağı” romanının təqdimat mərasimi keçiriləcək. Təqdimat mərasimində ölkənin tanınmış ziyalıları, söz adamları iştirak edəcək. 

“Ədəbiyyat və incəsənət” portalı xəbər verir ki, bu həmin o romandır ki, Fransanın ölkəmizdəki səfiri xanım Ann Buayon onun barəsində Tvitterdə xoş sözlər yazmışdı: “Yağışlı bazar günü üçün çox uyğundur”.

Qeyd edək ki, sözügedən roman Parisə ezamiyyətə gedən azərbaycanlı oğlanla orda ilk baxışdan vurulduğu fransız qızın sevgisindən bəhs edir, bu sevgiyə qızın milliiəyətcə erməni olan nənəsinin qurduğu maneələr sonda uçurulub dağıdılır. 

Roman “Azərkitab” Yayınlarında işıq üzü görmüşdür. 

Adəm İsmayıl Bakuvi Bakı şəhərində anadan olub. Elmlər doktorudur. Yüzlərlə analitik və publisistik məqalələr, 3 monoqrafiya, 20-yə yaxın elmi araşdırma müəllifidir.

İdarəetmə üzrə Beynəlxalq simpozium və konfranslarda dəfələrlə moderator kimi iştirakçı olub.

2021-ci ildə “Məhşər divanı: Yalanın 17 anı” sənədli romanı ilə ədəbiyyatda debüt edib. Müəllifin bəşər tarixində ən qatı cinayətkar hesab etdiyi 17 erməninin utopik məhkəməsindən bəhs edən bu əsəri ciddi rezonans doğurub.

“Ədəbiyyat və incəsənət”

(26.05.2023)