İyulun 18-də Azərbaycan Dövlət Akademik Filarmoniyasının Kamera və Orqan Musiqisi zalında “Cadenza Contemporary Orchestra” mövsümün bağlanış konsertini keçirəcək. 

“Sözsüz mahnı” adlı konsertdə əsasən orkestrin üzvləri solist kimi çıxış edəcəklər.

Hər mövsüm ənənəvi olaraq təşkil olunan solistlərin konsertində bu dəfə Vəfa Kuznetsova, Toğrul Abdullayev (violin), Sənubər Sultanova (violonçel), Mirxalid Məmmədzadə (fleyta) və Rəna Rəhimovanın (viola) ifasında Antonio Vivaldi "İki violin üçün a-moll konserti", Felix Mendelssohn Bartholdy "Sözsüz mahnı", Cecile Chaminade "Konsertino" və Qara Qarayevin "Don Kixot" simfonik qravürlərindən “Səyahət” əsərləri səsləndiriləcək.

Həmçinin orkestr tərəfindən təşkil olunmuş “2-ci qiraət vorkşopu: Partituralar üçün çağırış”ın qalibi olan Afaq Xəqaniqızının “Titrəyiş öncəsi Etobur çiçəyi” adlı əsəri (solist Elşən Məmmədov) ifa olunacaq. 

Qeyd edək ki, əsər Türkiyədə baş vermiş zəlzələ zamanı həlak olan insanların xatirəsinə həsr olunub.

Konsertə giriş sərbəstdir.

“Ədəbiyyat və incəsənət”

(18.07.2023)