Şəki “İpək Yolu” XII Beynəlxalq Musiqi Festivalı çərçivəsində iyulun 4-də axşam saatlarında musiqisevərlərə “Zəfər” muğam ansamblının konserti təqdim olunub.

Dünya əhəmiyyətli tarixi-memarlıq abidəsi Şəki Xan Sarayının qarşısında keçirilən konsertdə şəhər rəhbərliyi, festivalın təşkilatçı qurumlarının nümayəndələri, musiqisevərlər iştirak ediblər.

AzərTAC-ın bölgə müxbiri xəbər verir ki, konsertin əvvəlində ansamblın fəaliyyəti barədə məlumat verilib. 

Bildirilib ki, ansamblın bütün ifaçıları Azərbaycanda və onun hüdudlarından kənarda çoxsaylı çıxışları ilə yaxşı tanınırlar. Ansamblın bədii rəhbəri tarzən Rüstəm Müslümovdur. O, Heydər Əliyev Fondunun təşkilatçılığı ilə keçirilən televiziya muğam müsabiqəsində ansamblın rəhbəri kimi çıxış edib. İfaçı, həmçinin 2019-cu ildə keçirilən Beynəlxalq “İpək Yolu” festivalının iştirakçısı olub.

Ustad xanəndə, Əməkdar incəsənət xadimi Aqil Məlikovun, xanəndələr Vəfa Vəzirovanın, Hüseyn Məlikovun təqdim etdikləri xalq və bəstəkar mahnıları, muğamlar tamaşaçılar tərəfindən alqışlarla qarşılanıb. İfaçıları tarda Rüstəm Müslümov, kamançada Elnur Salahov, balabanda Pərviz Mirzəyev, nağarada Səyyar Teymurov müşayiət ediblər.

Uğurla başa çatan konsertin sonunda kollektivə festivalın xatirə hədiyyəsi təqdim olunub.

Festivalın proqramına uyğun olaraq, axşam “Yuxarı Karvansaray” mehmanxana-kompleksində Çin Xalq Respublikasının Lianşan-İy Muxtar Vilayətinin ansamblının konserti olacaq.

“Ədəbiyyat və incəsənət”

(05.07.2013)