Bakıdakı Rus evində istedadlı vokalçı, Üzeyir Hacıbəyli adına Bakı Musiqi Akademiyasının məzunu, beynəlxalq musiqi müsabiqələrinin laureatı, vaxtilə Azərbaycan Dövlət Akademik Opera və Balet Teatrında çalışmış Anastasiya Boboviçin konserti təşkil olunub. 

Bu barədə Rusiya İnformasiya-Mədəniyyət Mərkəzinin (RİMM) mətbuat xidmətin məlumat yayıb. 

A.Boboviç artıq uzun illərdir ki, həm Türkiyədə, həm də Rusiyada yaradıcı və pedaqoji fəaliyyət göstərir. 

Doğma şəhərə gələn A.Boboviç Bakıdakı Rus evinin dəvətini lütfkarlıqla qəbul edərək, konsertmeyster, Azərbaycan Respublikasının Əməkdar artisti İlahə Sadıxzadə ilə birgə qonaqlara gözəl musiqi axşamı ərməğan edib. 

Konsert proqramında V.A.Motsart, M.İ.Qlinka, C.Verdi, N.A.Rimski-Korsakov və digər dahi bəstəkarların əsərləri səsləndirilib.

“Ədəbiyyat və incəsənət”

(03.07.2023)