Beynəlxalq Muğam Mərkəzində müğənni Cəlal Abbasov və pianoçu Nizami Əliyevin "Bir axşam Bakıda" adlı birgə konserti təşkil edilib. 

Mərkəzin mətbuat xidmətinin məlumatına görə, gecədə xalq, bəstəkar və bir neçə dildə müxtəlif çeşidli mahnılar səsləndirilib. 

Cəlal Abbasov və Nizami Əliyevin birlikdə çalışdığı musiqi heyətinin tərkibi Bakının ən yaxşı musiqiçilərindən ibarətdir. Uzun illərdir ki, konsertlərdə musiqiçilərin solo ifaları səbirsizliklə gözlənilir və bu ənənə dəyişmir. Sevilən pianoçu Nizami Əliyevin improvizələri, caz elementləri konsertə xüsusi rəng qatıb. Proqramda olan vətənpərvərlik ruhlu mahnılar, eyni zamanda, xalq, bəstəkar, klassik və estrada kompozisiyaları tamaşaçılar tərəfindən böyük coşqu ilə qarşılanıb.

Qeyd edək ki, Cəlal Abbasov 2008-ci ildə keçirilən gənc ifaçıların birinci "Bakı gecələri" müsabiqəsində Qran-Prinin sahibi, eləcə də bir neçə yerli və beynəlxalq musiqi festivallarının iştirakçısı, həmçinin qalibidir. İfaçı Bakının "ÜNS" teatrının səhnəsində "Notterdam" dünya musiqisinin premyerasında Febusun partiyasını ifa edib. Eyni zamanda o, 2009-cu ildə Bakıda keçirilən bədii gimnastika üzrə 25-ci Avropa çempionatının himninin ifaçısıdır. Müğənni Cəlal Abbasov 2011-ci ildə Türkiyədə TÜRKSOY-un dəstəyi ilə keçirilən "Silifke musiqi haftası" layihəsi çərçivəsində xalq və pop musiqisi ifaçılarının 38-ci Beynəlxalq festivalının qalibi olub. O, həmçinin Heydər Əliyev Sarayında və Rəşid Behbudov adına Dövlət Mahnı Teatrında solo konsertlərlə çıxış edib.

“Ədəbiyyat və incəsənət”

(10.05.2023)