Tbilisidə Dünya Azərbaycanlılarının Həmrəyliyi Gününə həsr olunan “Gücümüz həmrəyliyimizdədir” adlı Yeni il konserti təşkil olunub.

“Ədəbiyyat və incəsənət” portalı AzərTAC-a istinadən xəbər verir ki, konsert Tbilisidəki M.F.Axundzadə adına Azərbaycan Mədəniyyəti Muzeyinin təşkilatçılığı, Gürcüstandakı Azərbaycanlı İş Adamları Birliyinin dəstəyi ilə reallaşıb.

Tədbirin keçirildiyi Akaki adına Aktyorlar Evinin səhnəsi Azərbaycanın və Gürcüstanın Dövlət bayraqları, Azərbaycan xalçaları və digər sənət nümunələri ilə bəzədilmişdi.

Konsert proqramı gürcü müğənnilərinin “Ay Laçın” mahnısı ilə açılıb.

Muzeyin əməkdaşı Leyla Əliyeva Dünya Azərbaycanlılarının Həmrəyliyi Günü münasibətilə təbrik edib, bu əlamətdar bayramın əhəmiyyətini qeyd edib.

Sonra sevilən gürcü müğənni Dito Kisişvili, aşıq Nargilə Mehdiyeva, Azərbaycanın Əməkdar artistləri Nərgiz Əliyeva və Fəridə Məlikova, azərbaycanlı və gürcü müğənnilər, "Ceyran" və "Melitassy" rəqs ansamblları maraqlı konsert proqramı ilə çıxış ediblər.

Konsert çərçivəsində 2022-ci ildə Azərbaycan Mədəniyyəti Muzeyinin fəaliyyətini işıqlandıran, eləcə də Azərbaycan –Gürcüstan dostluq əlaqələrinin inkişafında fərqlənən jurnalistlər mükafatlandırılıblar.

Mükafat alan jurnalistlər sırasında AZƏRTAC-ın Gürcüstan üzrə müxbiri Xətayi Əzizov da var.

Konsert gənc tarzən Ramin Pirməmmədovun Azərbaycan “Qurban olum Azərbaycan” mahnısı ilə başa çatıb.

Konsertdə Azərbaycanın və Türkiyənin Gürcüstandakı səfirliklərinin əməkdaşları, ictimaiyyət nümayəndələri iştirak ediblər.

“Ədəbiyyat və incəsənət”

(29.12.2022)