Azərbaycan mədəniyyətinə ağır itki üz vermişdir. Əməkdar incəsənət xadimi, Prezident təqaüdçüsü, tanınmış bəstəkar Oqtay Məmmədağa oğlu Rəcəbov ömrünün 81-ci ilində vəfat etmişdir.

Oqtay Rəcəbov 1941-ci il aprelin 5-də Bakı şəhərində anadan olmuşdur. Ali təhsilini Azərbaycan Dövlət Pedaqoji İnstitutunun fizika və istehsalatın əsasları fakültəsində alıb. 1969-cu ildə Azərbaycan Dövlət Konservatoriyasını bitirib.

Bəstəkarın çoxşaxəli yaradıcılığı, əksər musiqi janrlarını əhatə edən əsərləri mədəniyyətimizin xəzinəsini bəzəyən nadir nümunələrdəndir. Qələmindən çıxan simfoniyalar, kamera və vokal-simfonik əsərlər, musiqili-səhnə əsərləri, habelə kinofilmlərə yazdığı musiqi yüksək tamaşaçı rəğbəti qazanmışdır.

Ölkəmizin mədəni irsinin, dəyər və sərvətlərinin, o cümlədən uzun illər ərzində vətənin ən ağrılı dərdi olan torpaqlarımızın, bu yolda canından keçmiş qəhrəmanlarımızın yaddaşlara həkk olunması məqsədilə incəsənətə verdiyi töhfə danılmazdır. Qələmə aldığı “Xocalı avazları”, “Çingiz oratoriyası”, “Xocalı” simfoniyası və digər əsərlər xalqımızın qan yaddaşının mədəni aləmə yansımış təzahürüdür.

Bəstəkarın ümummilli lider Heydər Əliyevin xatirəsinə həsr etdiyi əzəmətli “Heydər” oratoriyası, fortepiano üçün “Ulu öndər” əsəri yaradıcılığının ölməz nümunələri kimi daim qəlblərdə yaşayacaqdır.

Oqtay Rəcəbovun əziz xatirəsi musiqisevərlərin yaddaşında daima yaşayacaqdır.

Allah rəhmət eləsin!

“Ədəbiyyat və incəsənət”

(16.12.2022)