Rusiyanın Həştərxan şəhərində “Opera.First” I Beynəlxalq Musiqi Festivalı keçirilir. Festivalın klassik və romantik musiqi nümunələrindən ibarət rəngarəng proqramında, simfonik və kamera konsertlərində musiqisevərlərin geniş rəğbətini qazanmış məşhur ariya, uvertüra və intermediyalar səslənəcək.
Azərbaycan da festivalda təmsil olunacaq. Belə ki, geniş populyar əsərlərlə yanaşı festivalın konsertlərində müasir musiqinin iki tanınmış nümayəndəsi – Arvo Pyarta və Firəngiz Əlizadənin yaradıcılığı təqdim olunacaq. Aktual musiqinin bu iki nümayəndəsinin vokal, simfonik və kamera musiqi janrlarında öz parlaq təcəssümünü tapan əsərləri “Şərq-Qərb” tendensiyasının əsas istiqamətlərini izləməyə imkan yaradır.
Festivalın açılış günündə təntənəli şəkildə Həştərxan Filarmoniyasının böyük zalında Rusiyanın tanınmış dirijoru, Rusiya Federasiyasının Xalq artisti M.Qolikovun idarəsi ilə Xəzəryanı Kamera Orkestri konsert proqramını təqdim edib. İlk musiqi nömrəsi kimi səslənən Firəngiz Əlizadənin “Metamorfozlar” əsəri tamaşaçıların böyük rəğbətini qazandı.
Festival öz işini davam etdirərək, musiqisevərlərə yeniliklər və sürprizlər bəxş edəcəkdir. Xüsusilə, qeyd etmək lazımdır ki, Firəngiz Əlizadənin musiqisinə teatr tamaşasının nümayişi böyük maraqla gözlənilir. Musiqimiz Rusiya cənubunu fəth etməkdədir, belə söyləyə bilərik.