Beynəlxalq Muğam Mərkəzində tanınmış qarmon ifaçısı Nizami Əsgərovun yaradıcılıq gecəsi keçirilib.

AzərTAC xəbər verir ki, sənətşünaslıq üzrə fəlsəfə doktoru, Əməkdar mədəniyyət işçisi Səadət Təhmirazqızının aparıcılığı ilə baş tutan gecədə tanınmış incəsənət xadimləri iştirak ediblər.

Tədbirdə Nizami Əsgərovun yaradıcılığından, onun gözəl musiqiçi, təcrübəli pedaqoq kimi xüsusiyyətlərindən söz açılıb. Bildirilib ki, tanınmış qarmon ifaçısı bəstəkarlıq qabiliyyəti olan, rəqs janrının quruluşunu, nəzəri əsaslarını bilən, eləcə də muğam sənətinə bələd olan istedadlı musiqiçilərimizdəndir. Onun qarmonda yaratdığı hər bir melodiya qəlbləri fəth edir, xalq sevgisi qazanır. Təsadüfi deyil ki, gecədə Nizami Əsgərovun müəllifi olduğu mahnı və rəqslər də yer alır.

Daha sonra görkəmli mədəniyyət xadimlərinin qarmon ifaçısının yaradıcılığı haqqında fikirləri videolent şəklində təqdim olunub.

Tədbir müğənnilərin və tanınmış qarmon ifaçılarının konsert proqramı ilə davam edib.

Sonda Nizami Əsgərov tədbirin təşkilatçılarına və iştirakçılarına təşəkkürünü bildirib.

Qeyd edək ki, SSRİ və Azərbaycanın Xalq artisti Zeynəb Xanlarovanın ansamblında yer alan Nizami Əsgərov dünyanın 20-dən çox ölkəsində qastrol səfərində olub.

“Ədəbiyyat və incəsənət”

(30.10.2024)