Oktyabrın 17-dən 27-dək Azərbaycan paytaxtında payızın ən parlaq hadisələrindən biri olan “Baku Jazz Festival” keçiriləcək. 2024-cü ildə festivalın 19 yaşı tamam olur. “Baku Jazz Festival”ının direktoru Leyla Əfəndiyeva AzərTAC -a müsahibəsində hazırlıqlar və bu il cazsevərləri gözləyən sürprizlər barədə danışıb.
-Leyla xanım, festivala hazırlıq necə gedir?
-Hazırda festivala hazırlıq tam sürətlə gedir. Demək olar ki, əsas işlər görülüb; həm musiqiçilərin gəlişi, həm onların konsert proqramına uyğunlaşması, həm də bir çox texniki məsələlər həll edilib. Bildiyiniz kimi, “Baku Jazz Festival” regionun ən böyük mədəniyyət tədbirlərindən biridir. Hər il proqramımızda onun sərhədlərini genişləndirən bir sıra tədbirlər nəzərdə tutulur. Yəni, konsertlərlə yanaşı, festival çərçivəsində caz mövzusunda foto və rəsm sərgiləri, uşaqlar və tələbələr üçün tədbirlər, caz ulduzları ilə görüşlər, yerli musiqiçilər üçün seminarlar və ustad dərsləri keçirilir. Bütün bunları təşkil etmək üçün vaxt və təbii ki, əmək tələb olunur. Bu il festivalımızın on doqquz yaşı tamam olur. Biz buna hazırlaşırıq və onun başlanmasını səbirsizliklə gözləyirik.
-Bu il bizi hansı proqram gözləyir?
-Birincisi, bu, konsertlərdir. Bu il festivalımızı üç “Grammy” mükafatı laureatı ziyarət edəcək. On ikidən çox ölkədən klassik ənənəvi üslubdan dinamik caz-roka qədər tamamilə fərqli üslublarda caz ifa edəcək maraqlı musiqiçilər gələcəklər. Proqram çox genişdir. Konsertlərdən əlavə, “Moving Sketch” adlı rəsm sərgisi, “Best World Jazz Foto” fotosərgisi, Bəhram Bağırzadənin uşaqlar üçün “Caz” kitabının təqdimatı, dünya caz ulduzları ilə görüşlər, eləcə də maraqlı “İpək üzərində caz” qurama ekspozisiyası keçiriləcək. Əlbəttə ki, gecə yem-seyşenləri (jem-sessiya - verilmiş mövzu üzrə fərdi və ya ümumi improvizasiya - müəllif) də olacaq.
-Cari ildə keçirilən festival nə ilə fərqlənəcək, hər hansı yeniliklər olacaqmı?
-Şübhəsiz ki, hər bir festivalımız əvvəlkilərdən təzə ideyaları ilə fərqlənir. Biz caz musiqisinə daha çox gəncləri cəlb etməyə çalışırıq. Ölkəmizin əsas hissəsinin estrada musiqisinə üstünlük verdiyini nəzərə alsaq, bu, asan məsələ deyil. Bütün dünyada vəziyyət belədir. Amma təbii ki, inkişaf etmiş ölkələrdə caz auditoriyası var. Məqsədimiz tamaşaçı auditoriyamızı ildən-ilə genişləndirməkdir. Ona görə də bu il festivalın görkəmli basçı Munir Hosnun konserti ilə açılacağı məkanlardan biri kimi yenilənmiş Jolly Jokeri seçdik. Oradaca festivalın digər günlərində Rain Sultanovun beynəlxalq “Syndicate” qrupu və Fransa cazının yüksələn ulduzu Elianın konsertləri olacaq. Biz müxtəlif caz janrlarına uyğun olan ən əlverişli konsert salonlarını cəlb etdik.
-Bu hadisənin şəhərimiz üçün nə kimi əhəmiyyəti var?
-Düşünürəm ki, “Baku Jazz Festival”ı əhalimizin musiqi zövqünün formalaşmasında mühüm rol oynayır. Konsertlərimizə beş-yeddi min adam gəlsə belə, bu, kifayətdir. Əgər onlardan biri uşaqları da gətirsə və onlar da öz növbəsində intellektual musiqi ilə tanış olmağa, alətlərin səslərini ayırd etməyi öyrənməyə, improvizasiyaları başa düşməyə başlasalar, bu, bizim qələbəmiz və ölkəmizin mədəniyyətinə əsas töhfəmiz olacaq.
-Ölkəmizdə caz mədəniyyətinin səviyyəsini necə qiymətləndirə bilərsiniz?
-Bizim gənc istedadlı caz musiqiçilərimiz var, onlar tezliklə öz sözünü deyəcəklər. Onların bir çoxu festivalımız çərçivəsində hər il keçirdiyimiz “I Am Jazzman!” gənc caz ifaçılarının müsabiqəsi sayəsində tanınıb. Onlardan bəziləri bu il hətta festivalda çox məşhur ifaçılarla birlikdə çıxış edəcəklər. Bəzilərinin adlarını çəkəcəyəm, çünki əminəm ki, onlar tezliklə dünyanın caz məkanlarını fəth etməyə başlayacaqlar. Bunlar Nurlan Hüseynzadə, Cavanşir Əbdüləli, Nicat Quliyev, Məhəmməd Allahverdiyevdir. Mən tamaşaçılarımızı oktyabrın 17-dən 27-dək “Baku Jazz Festival”ına gələrək festivalımızın xarici qonaqları ilə yanaşı onların da ifalarını dinləməyə, konsertlərdən əlavə, bir sıra parlaq, maraqlı tədbirlərdə iştirak etməyə dəvət edirəm.
“Ədəbiyyat və incəsənət”
(24.09.2024)
