Könül, “Ədəbiyyat və incəsənət”

2022-ci ilin bu iyul günündə ən çox diqqətimi çəkən hadisəni sizlərə xatırlatmaq istəyirəm. “Notr-Dam de Pari" müziklı dörddəbir əsr tarixi ərzində 2022-ci ilin bu günündə ilk dəfə Nyu-Yorka gəldi. Bütün dünyada ən geniş şöhrət qazanmış və digər dillərə, o cümlədən ingilis dilinə dəfələrlə tərcümə olunmasına baxmayaraq müziklın (2001-ci ildə Las-Veqasda amerikalılara uyğunlaşdırılmış və xeyli ixtisar olunmuş versiyanın təqdimatını nəzərə almasaq) ABŞ-da tammiqyaslı tamaşası hələ də olmamışdı. Buna görə də bu hadisə xüsusi anlam daşıyaraq böyük ajiotaj yaratdı.

Bu barədə xəbəri “Ədəbiyyat və incəsənət” portalı Euronews-un materialları əsasında hazırlayıb təqdim etmişdi.

Riccardo Koççante, "Notre dam de Pari"nin bəstəkarı deyir:

"Nyu-Yorka gəlmək, əlbəttə ki, yeni bir təcrübədir, bu, ölkəyə ehtiyatla yenidən qayıtmaq cəhdidir, çünki bu ölkə, xüsusilə Brodvey asanlıqla belə işğallarla barışan ölkə deyil".

Əlbəttə ki, bəstəkar Brodveydə çıxış etməyin tam məsuliyyətini duyaraq belə deyir. Amma o da var ki, “Notre dam de Pari” də hələm-hələm tamaşalardan deyil, bütün dünyada ad çıxaran, meydan sulayan bir tamaşadır. "Ginnesin Rekordlar Kitabı"na düşən müzikl 23 ölkədə doqquz dildə oynanılıb.

Hesab edilir ki, "Notr-Dam de Pari"ni artıq səhnədə canlı olaraq bütün dünyada 11 milyondan artıq insan izləyib. Ötənilki dəfə isə müzikl Linkoln mərkəzində fransızca, lakin ingilis subtitrləri ilə səsləndirilirdi.

Bu da tamaşa zalından çıxan nyu-yorkluların agentliyin mikrofonuna dedikləridir:

"Mən hər bir mahnını tanıdım, mən bütün sözləri bilirəm, hətta mənim altyazılara belə ehtiyacım yox idi. Bu inanılmaz, fenomenaldır. Biz çox şadıq ki, nəhayət, müzikl buraya gəlib".

“Müzikl yalnız ümidləri doğrultmadı, hətta mənim gözləntilərimi də xeyli üstələdi”.

“Mən "Notr-Dam de Pari"yə ikinci, hətta üçüncü dəfə də getməyi planlaşdırıram. Hesab edirəm ki, aktyor heyəti sadəcə parlaqdır. Onlar bu tarixi hadisəni həyata məhz mənim gözlədiyim kimi, 100 faiz dəqiqliklə pərçimlədilər. Təqdimatdan çox məmnunam".

Qeyd edək ki, ümumən, Nyu-Yorkda on iki tamaşa nümayişi planlaşdırılmışdı. Biletlər uçurdu, tapmaq olmurdu.

Sonda bir gün Bakıda da "Notr-Dam de Pari"yə tamaşa etməyə olan ümidlərimizi izhar edək.

“Ədəbiyyat və incəsənət”

(18.07.2024)