Ümummilli Lider Heydər Əliyevin anadan olmasının 100 illiyi və Azərbaycanla Malayziya arasında diplomatik əlaqələrin qurulmasının 30 illiyi münasib mayın 9-dan 16-dək Malayziyada azərbaycanlı gənc rəssamlarının "The Art of Diplomasy" adlı sərgisi açılacaq. Sərgi “Dirçəliş” Gənclərin Sosial-Psixoloji Reabilitasiya Mərkəzinin təşəbbüsü ilə təşkil olunacaq.

Mərkəzin direktoru İslam Baxşəliyev bildirib ki, bu məqsədlə 16 nəfərdən ibarət nümayəndə heyəti mayın 7-də Malayziyaya yola düşəcək. Sərgiyə Azərbaycanın Malayziyadakı səfirliyi təşkilatı dəstək verir.

“KL City ART” Qalereyasında keçiriləcək sərgidə 11 rəssamın 37 əsəri nümayiş olunacaq. Rəssamlardan Sevinc Əliyeva, Kamila Zərbəliyeva, Firəngiz Hüseynova, Aybəniz Zeynalova, Mahru Norton, Zarema Yagizarova, Kəmalə Müstafayeva, Emiliya Axundova, Nigar Bağırova, Bela İsmayılova və Raul Axundovun Azərbaycan və eyni zamanda Malayziya incəsənəti ilə bağlı rəngarəng rəsmləri yerli incəsənət sevərlərin diqqətinə təqdim ediləcək. Azərbaycan rəssamlıq tarixində həmişə qadın rəssamların rolu böyük olmuş və bu gün də öz təsdiqini tapır. Belə ki, sərgidə 11 rəssamdan 10-nu qadındır”,- deyə Mərkəzin rəhbəri bildirib.

Qeyd edək ki, "Dirçəliş" Gənclərin Sosial-Psixoloji Reabilitasiya Mərkəzi 2010-cu ildən analoji sərgiləri keçirir. Mərkəz tərəfindən indiyədək 20-dən çox Avropa ölkəsində, o cümlədən ABŞ, Böyük Britaniya, Dubay, Sinqapur və Misirdə sərgilər təşkil olunub və bu sərgilərdə ümumilikdə 387 rəssamın 1829 rəsm əsəri sərgilənib.

“Ədəbiyyat və incəsənət”

(04.05.2023)