Mədəni İrsin Qorunması, İnkişafı və Bərpası üzrə Dövlət Xidməti həyəcan təbili vurub. 

Bakı şəhəri, Səbail rayonu, Rəsul Rza küçəsi, 11 ünvanında yerləşən 3306 inventar nömrəli yerli əhəmiyyətli tarix-memarlıq abidəsinə müdaxilə olunub. Yəni, binanın icarədarı onun fasadında eksteryer görünüşü dəyişdirən təmirə qol qoyub. Həmin binanın fotosunu qapaq şəklində görürsünüz.

“Ədəbiyyat və incəsənət” portalı xəbər verir ki, pozuntu halı barədə Mədəni İrsin Qorunması, İnkişafı və Bərpası üzrə Dövlət Xidməti media üçün məlumat yayıb. Məlumatda deyilir:

“Tarixi abidə olan yaşayış binasında qanunsuz təmir işlərinin aparıldığı aşkar edilib. Müdaxilə faktının qarşısı Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Bakı Regional İdarəsi və Səbail rayon İcra Hakimiyyətinin əməkdaşları tərəfindən alınıb. Müdaxilə faktı ilə bağlı qanuna müvafiq tədbirlər görülməkdədir.

Qeyd edək ki, “Tarix və mədəniyyət abidələrinin qorunması haqqında” Azərbaycan Respublikası Qanununun 10-cu maddəsinə əsasən, abidələrin bədii-estetik görkəminin dəyişdirilməsi, uçurulması və onlar üçün təhlükə yarada biləcək təmir, inşaat, təsərrüfat və digər işlərin aparılması qadağandır.

Həmin qanunun 25-ci maddəsinə əsasən abidələrin üzərində bərpa, konservasiya, təmir, rekonstruksiya, regenerasiya və digər işlər onların layihələri müvafiq icra hakimiyyəti orqanının müəyyən etdiyi elmi təşkilatın rəyi nəzərə alınmaqla, müvafiq icra hakimiyyəti orqanının müəyyən etdiyi orqan (qurum) tərəfindən təsdiq edildikdən sonra aparılır”.

Gəlin ümid edək ki, analoji halla bir daha rastlaşmayacağıq. Tarixi abidəni hər kəs öz doğma evi qədər sevməli və qorumalıdır. 

“Ədəbiyyat və incəsənət”

(13.04.2023)