Bakı Şəhər Mədəniyyət Baş İdarəsinin Fikrət Əmirov adına 6 nömrəli incəsənət məktəbinin Rəssamlıq şöbəsinin şagirdi Ziyad Qasımlı (müəllim Elmar Ağamirzə) Yaponiyada keçirilən Kanagava Biennalesi Beynəlxalq Uşaq İncəsənət Sərgisində uğurla iştirak edib.
“Ədəbiyyat və incəsənət” portalı Baş idarənin verdiyi məlumata istinadən xəbər verir ki, Ziyad Qasımlı çəkdiyi rəsmlər, xüsusən manşetimizi bəzəyən “Narla qız” rəsmi sayəsində "Xüsusi mükafat"a layiq görülərək istedadı və işinin keyfiyyəti ilə yaşıdlarından xeyli fərqlənib.
Qeyd edək ki, Kanagava Biennalesi Beynəlxalq Uşaq İncəsənət Sərgisi müxtəlif ölkələrin gənc rəssamlarının əsərlərini bir araya gətirməklə, incəsənətin gücünü və uşaq yaradıcılığını nümayiş etdirmək üçün ənənəvi olaraq hər il keçirilən müsabiqədir.
“Ədəbiyyat və incəsənət”
(29.03.2023)
