Bu gün “QGallery” Bakı Rəssamlıq Qalereyasında konseptual heykəltaraş və rəssam Bütünay Haqverdiyevin “Yarımadanın gündəliyi” adlı fərdi sərgisi açılacaq. 

“Ədəbiyyat və incəsənət” portalı qalereyanın xəbərinə istinad edərək bildirir ki, Bütünay Haqverdiyevin “Yarımadanın gündəliyi” sərgisi Abşeronun sənədli xronologiyası, Abşeron kəndlərinin mənzərəsinin “fotoyaddaş”ıdır.
Gənc, istedadlı, irsi rəssam Bütünay Haqverdiyevin əl işlərini qeyri-adi enerji və emosional zənginlik fərqləndirir. Onun rəsmlərində hərə özünə məxsus olan nəyisə tapır. Azərbaycanın tanınmış təsviri sənət ustası Ucal Haqverdiyev (1960-2004) və rəssam Yelena Haqverdiyevanın oğlu sanki öz tamaşaçısını uşaqlığın anabiozuna aparır. Orada isti və sakitlikdir, irəlidə yalnız cəsarətli arzular var və adama elə gəlir ki, bu arzulara çatmaq üçün heç bir maneə yoxdur.
Bütünay Haqverdiyev Əzim Əzimzadə adına Azərbaycan Dövlət Rəssamlıq Məktəbində və Moskvada Britaniya Ali Dizayn Məktəbində oxuyub. O, bir neçə kollektiv sərgilərdə, o cümlədən 55-ci Venesiya biennalesində, eləcə də fərdi ekspozisiyalarda iştirak edib.
Sərgi dekabrın 30-dək davam edəcək.

“Ədəbiyyat və incəsənət”
(15.12.2023)