Könül, “Ədəbiyyat və incəsənət”
Təsviri sənət sevərləri paytaxtımızda düzənlənən hər bir sərgini maraqla izləyirlər. Bu dəfə lap maraqlı olacaq. Çünki Bakıya məşhur rəssam, heykəltəraş, musiqiçi, əslən Güney Azərbaycandan olan Vədud Müəzzin gəlir.
Muzey Mərkəzinin Sərgi Qalereyasında Ümummilli Lider Heydər Əliyevin 100 illik yubileyi çərçivəsində keçiriləcək fərdi sərgi təsviri sənət bilicilərini, sənətsevərləri və təsviri sənət həvəskarlarını müəllifin yaradıcılığına xas olan bənzərsiz ab-havaya köklənməyə dəvət edir.
Sərgidə Vədud Müəzzinin meşələrin gözəlliyini, atların ruhunu, insan portretlərinin dərinliyini və Azərbaycanın nəfəs kəsən mənzərələrini əks etdirən 50-yə yaxın əsəri nümayiş olunacaq.
Qeyd edim ki, rəssamın çəkdiyi Habil Əliyevin portreti çox məşhurdur, bir çox yerlərdə sərgilənərək bəyənilib.
Sərginin məhz “Heydər Əliyev İli”nə həsr olunması Vədud Müəzzinin əsərlərindən ibarət sərginin ilk dəfə 2002-ci ildə Azərbaycanda keçirilməsinə görə Azərbaycan xalqının Ulu Öndərinə dərin minnətdarlığın bariz nümunəsidir.
Qeyd edək ki, bu, Vədud Müəzzinin Muzey Mərkəzinin Sərgi Qalereyasında təşkil olunan sayca dördüncü sərgisidir.
Qalereya ilk dəfə 2013-cü ilin noyabrında rəssamın öz zənginliyi, parlaqlığı və bənzərsiz realizmi ilə heyran qoyan əsərlərini bakılılara və paytaxtın qonaqlarına təqdim edib. Ustadın əvvəlki sərgiləri isə 2018 və 2019-cu illərdə keçirilib.
Vədud Müəzzin 1960-cı ildə İranın Ərdəbil şəhərində anadan olub. O, öz yaradıcılıq fəaliyyətinə 1980-ci ildə başlayıb. Rəssam indiyədək ABŞ (Kaliforniya), Kanada və Avropada (Münhen və Paris) fərdi və qrup şəklində sərgilərdə iştirak edib. Məşhur rəssam təsviri sənət sahəsində müəllimlik fəaliyyəti ilə də məşğul olub və rəsm əsərləri ilə yanaşı, bir çox heykəltəraşlıq nümunələrinə də imza atıb.
"Mistik dünyalar" sərgisi sənətsevərləri həyatın ən dərin elementlərinin parlaq tərənnümünü əks etdirən ecazkar aləmə dəvət edir. Vədud Müəzzinin fırçası sehrli çubuq kimi insanın gözləri önündə möcüzələr dünyasını canlandırır, insanın ruhunu təbiətin şeriyyətini kəşf etməyə səsləyir. Təsviri sənətin və təbiətin gözəlliyinin mükəmməl vəhdətini, ruhun sehrinin hökm sürdüyü və təbiət möcüzələrinin əks olunduğu aləmi təsvir edən əsərlər öz sehri ilə insanın ruhunu valeh edir.
Sərgiyə noyabrın 17–21-də saat 10:00-dan 18:00-dək giriş sərbəstdir.
Ünvan: Bakı şəhəri, Neftçilər prospekti 49, Muzey Mərkəzi (4-cü mərtəbə).
Əminəm ki, bu sərgi içi çən qarışıq bütün sənətsevərləri razı salacaq.
“Ədəbiyyat və incəsənət”
(17.11.2023)
