Respublikanın əksər bölgələrində avqust ayının birinci ongünlüyündə hava şəraiti az yağıntılı keçib, havanın orta temperaturu çoxillik iqlim normasından 3-5º yüksək, ötən ilin göstəriciləri ilə müqayisədə isə norma daxilində olması ilə səciyyələnib.

Ekologiya və Təbii Sərvətlər Nazirliyinin Milli Hidrometeorologiya Xidmətindən verilən məlumata görə, havanın dekadalıq orta temperaturu paytaxt üzrə Maştağada 29º, Qarabağ bölgəsində, Mil – Muğan, Gəncədə, Goranboyda və Mərkəzi Aranda 30-31º, Lənkəran - Astara bölgəsində 28º, Tovuz-Qazaxda 21-29º, Quba və Dağlıq Şirvanda 27º, Şəki - Zaqatalada 27-28º qeydə alınıb.

Havanın minimum temperaturu Gədəbəy və Qazaxda 13º, Qubada 18º, Dağlıq Şirvanda, Naxçıvanda, Zaqatalada, Tovuzda və Ceyrançöldə 19º, Lənkəranda, Gəncədə, Şəkidə və Qəbələdə 20º, Qarabağ bölgəsində 21º, Cəfərxanda və Mərkəzi Aranda 22º, Maştağada 23º təşkil edib.

Demək, Azərbaycanın ən isti bölgəsi Mərkəzi Aran rayonları (Kürdəmir başda olmaqla), ən sərin bölgəsi isə Gədəbəydir.

“Ədəbiyyat və incəsənət”

(18.08.2023)