Coşqun Xəliloğlu,  Azərbaycan Yazıçılar Birliyinin üzvü, “Ədəbiyyat və incəsənət” üçün

Kürdəmir rayonunun Sovla kəndində anadan olmuş, 19 sentyabr  2023-cü ildə lokal  antiterror tədbirləri zamanı qəhrəmanlıqla şəhid olmuş Eltun Cavanşir oğlu  Yusifovun  əziz xatirəsinə ithaf edirəm. (05.01.2004.-19.09.2023.)

Çöhrəsindən yağırdı nur,

Qorxmaz, cəsarətli, məğrur,

Əsgər oldu, igid, cəsur,

Düşmənlərə qan ağlatdı,

Ən uca məqama çatdı.

Adı Eltun, el balası,

Dürüst, şiridil balası,

Gəldi hər vaxt xoş sədası,

Sovlanın adın ucaltdı,

Ən uca məqama çatdı.

Hünəri dastana bənzər,

Şöhrəti elləri gəzər,

Adı tariximi bəzər,

Vətənə layiq övladdı,

Ən uca məqama çatdı.

19 il ömür sürdü,

Yüz ilin işini gördü,

Dünya müəmmadı, sirdi,

Düşmənin günün qaraltdı,

Ən uca məqama çatdı.

Qarakənddə şəhid oldu,

Unudulmaz bir ad oldu,

Xalqın ürəyinə doldu,

Şan-şərəfli bir yol tutdu,

Ən uca məqama çatdı.

Dərd yoxdu, çarə tapılmaz,

Qış qurtarıb gəlibdir, yaz,

Zaman heç zaman yanılmaz,

Həyatı örnək həyatdı,

Ən uca məqama çatdı.

                    (24.03.2025)

“Ədəbiyyat və incəsənət”

(02.04.2025)