“Ədəbiyyat və incəsənət” portalı gənc yazar Elşad Baratın şəhidlər barədə silsilə şeirlərinin təqdimini davam etdirir.
Şəhid Orxan Əlili
Azərbaycan Ordusunun əsgəri, Vətən müharibəsinin şəhidi Orxan Elşad oğlu Əlili 2000-ci il avqustun 23-də Şəmkir şəhərində anadan olub. O, 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Şuşanın azadlığı uğrunda gedən döyüşlərdə savaşıb. Orxan Əlili noyabrın 7-də Şuşa döyüşləri zamanı şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Orxan Əlili ölümündən sonra "Vətən uğrunda" medalı ilə təltif edildi.
Azərbaycan ərazilərinin işğaldan azad olunması zamanı döyüş tapşırıqlarını uğurla yerinə yetirdiyinə, düşmənin əsas qruplaşmalarının məhv edilməsi ilə qoşunların döyüş qabiliyyətinin qorunub saxlanılmasında fərqləndiyinə görə Azərbaycan Prezidenti İlham Əliyevin 18.12.2020-ci il tarixli Sərəncamına əsasən Orxan Əlili ölümündən sonra "Cəsur döyüşçü" medalı ilə təltif edildi.
Azərbaycanın Şuşa rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Orxan Əlili ölümündən sonra "Şuşanın azad olunmasına görə" medalı ilə təltif edildi.
Baxıb gülümsəyirsən,
Məzarının danışdan.
Vətən tarixi yazdın,
Sən iyirmi yaşından.
Xocalıda tökülən,
Qanımıza qan dedin.
Bütün arzularını,
Vətənə qurban dedin.
Məzarına baxıram,
Sanki məzar dil açır.
Şəhidlərin məzarı,
Niyə belə nur saçır?
Nur saçan məzarına,
Səmalar qar ağlayır,
İldırımlar hönkürür,
Buludlar qan ağlayır.
Ağlayır bu məzarın,
Başında duran ana.
Oğul toyu, qız toyu,
Arzular quran ana.
Gedirəm, salamat qal,
Zəfər qayəsi şəhid.
Səni tanrı tanıyır,
Quran ayəsi şəhid.
“Ədəbiyyat və incəsənət”
(25.09.2024)
